മാർബിൾ കഷ്ണത്തിൽ താളമിട്ട കിച്ചുവിന് ചെണ്ടയും ഡ്രംസെറ്റും എത്തി; സമ്മാനിച്ചത് മലയാളത്തിലെ പ്രിയതാരങ്ങൾ 

മാർബിൾ കഷണത്തിൽ രണ്ട് കോലുകൾ കൊണ്ട് 'സംഗീതമേ അമര സല്ലാപമേ' എന്ന സിനിമാ​ഗാനത്തിന് താളമിടുന്ന ആറുവയസ്സുകാരന്റെ പ്രകടനം സോഷ്യൽ മീഡിയയിൽ നിമിഷനേരം കൊണ്ടാണ് വൈറലായത്. രണ്ടര മിനിറ്റ് മാത്രം ദൈർഘ്യമുള്ള വിഡിയോ ശ്രദ്ധനേടിയതിന് പിന്നാലെ രണ്ടാമത്തെ പാട്ടും എത്തി. ഇക്കുറി അങ്കോപാങ്കം സ്വരമുഖരം എന്ന ​ഗാനമാണ് ഈ മിടുക്കൻ കൊട്ടികേൾപ്പിച്ചത്. പാറശേരി കറുത്തേട്ടിൽ സുമേഷിന്റെ മകൻ അഭിഷേകാണ് (കിച്ചു) സോഷ്യൽ മീഡിയയിലെ ഈ വൈറൽ താരം. കിച്ചുവാകട്ടെ സ്വന്തമായി ഒരു ചെണ്ടയും ഡ്രംസെറ്റും കിട്ടിയതിന്റെ സന്തോഷത്തിലാണ് ഇപ്പോൾ. 

കിച്ചുവിന്റെ വിഡിയോ കണ്ട നടൻ ജയറാമാണ് ഈ കൊച്ചുമിടുക്കന് ചെണ്ട വാ​ഗ്ദാനം ചെയ്തത്. പിന്നാലെ യുവനടൻ ഉണ്ണിമുകുന്ദൻ കിച്ചുവിനായി ഒരു ഡ്രംസെറ്റ് നൽകി. സംവിധായകൻ വിജേഷ് മണിയാണ് ചെണ്ട കിച്ചുവിന്റെ വീട്ടിലെത്തിച്ചത്. ഉണ്ണിമുകുന്ദൻ ഫാൻസ് അസോസിയേഷൻ അം​ഗങ്ങള് ഡ്രംസെറ്റും സമ്മാനിച്ചു. 

ചെറുപ്രായം മുതൽ കൊട്ടാൻ താത്പര്യം പ്രകടിപ്പിച്ചിരുന്ന അഭിഷേകിനെ ബാൻഡ് സെറ്റിൽ അം​ഗമായ ഒരു അയൽക്കാരനാണ് പരിശീലിപ്പിച്ചത്. ഇപ്പോൾ വിഡിയോ പുറത്തുവന്നതിന് പിന്നാലെ ഏറെ ആരാധകരെ നേടിയിരിക്കുകയാണ് ഈ കൊച്ചു മിടുക്കൻ. മുമ്പ് ബാൻഡ് സെറ്റ് ടീമിൽ ഇടം നേടണം എന്ന് ആ​ഗ്രഹിച്ചിരുന്ന അഭിഷേകിന് ഇപ്പോൾ കൂടുതൽ വലിയ സ്വപ്നങ്ങളാണ്. കൂടുതൽ പരിശീലിക്കുമെന്നും കഴിവ് വളർത്തിയെടുക്കുമെന്നുമാണ് അഭിഷേകിന്റെ വാക്ക്.