മികച്ച നടൻ നിവിൻ, ചിത്രം മൂത്തോൻ; ന്യൂയോർക്ക് ഇന്ത്യൻ ഫിലിം ഫെസ്റ്റവലിൽ അഭിമാനനേട്ടം

ന്യൂയോർക്ക് ഇന്ത്യൻ ഫിലിം ഫെസ്റ്റവലിൽ അഭിമാനനേട്ടവുമായി മൂത്തോൻ. മികച്ച ചിത്രത്തിനും നടനും ഉൾപ്പടെ മൂന്ന് പുരസ്കാരങ്ങളാണ് ​ഗീതു മോഹൻദാസിന്റെ ചിത്രം സ്വന്തമാക്കിയത്. മൂത്തോനിലെ അഭിനയത്തിന് നടൻ നിവിൻ പോളിയെ മികച്ച നടനായി തെരഞ്ഞെടുത്തു. മൂത്തോനിലെ സഞ്ജന ദീപുവാണ് മികച്ച ബാലതാരം. നിവിൻ പോളിക്ക് ലഭിക്കുന്ന ആദ്യത്തെ അന്താരാഷ്ട്ര പുരസ്കാരമാണിത്.

കൂടാതെ മികച്ച നടിക്കുള്ള അവാർഡ് സ്വന്തമാക്കിയത് ഒരു മലയാളിയാണ്. റൺ കല്യാണി എന്ന ചിത്രത്തിലെ അഭിനയത്തിന് ഗാർഗി ആനന്തത്തിനാണ് പുരസ്കാരം ലഭിച്ചത്. ഗമക്ഖർ എന്ന ചിത്രമൊരുക്കിയ അചൽ മിശ്രയാണ് മികച്ച സംവിധായകൻ.കോവിഡ് പ്രതിസന്ധിയെ തുടർന്ന്  ഓൺലൈൻ സ്ട്രീമിങ് വഴിയാണ് അവാർഡുകൾ പ്രഖ്യാപിച്ചത്. ഓൺലൈന്‍ വഴി നടത്തിയ മേളയിൽ 14 ഭാഷകളിൽ നിന്നായി 40 സിനിമകളും നാല് ഡോക്യുമെന്ററികളും 30 ഹ്രസ്വചിത്രങ്ങളുമാണ് പ്രദർശിപ്പിച്ചത്. ജൂലൈ 24 മുതൽ ഓഗസ്റ്റ് 2വരെയായിരുന്നു മേള സംഘടിപ്പിച്ചത്.

മൂത്തോൻ ഇതിനോടകം നിരവധി രാജ്യാന്തര മേളകളിൽ പ്രദർശിപ്പിച്ചിരുന്നു. മികച്ച അഭിപ്രായമാണ് ചിത്രം നേടിയത്. ഗീതു മോഹന്‍ദാസ് തന്നെയാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. നിവിൻ പോളിയുടെ ഗംഭീര പ്രകടനം തന്നെയാണ് പ്രധാനആകർഷണം. ഛായാഗ്രഹണം ഭര്‍ത്താവും സംവിധായകനുമായ രാജീവ് രവിയാണ്. ചിത്രത്തിലെ ഹിന്ദി സംഭാഷണങ്ങള്‍ ഒരുക്കിയിരിക്കുന്നത് ബോളിവുഡ് സംവിധായകനായ അനുരാഗ് കശ്യപാണ്. ശശാങ്ക് അറോറ, ശോഭിത ധുളിപാല, രോഷന്‍ മാത്യു, ദിലീഷ് പോത്തന്‍  തുടങ്ങി ഒരു വന്‍ താരനിര തന്നെ ചിത്രത്തിൽ അണിനിരക്കുന്നു.