മീ ടു വെളിപ്പെടുത്തലുകൾ; അലോക് നാഥിനെ താര സംഘടനയിൽ നിന്ന് പുറത്താക്കി 

ലൈംഗികാരോപണവും മോശം പെരുമാറ്റവും ആരോപിച്ച് നിരവധിപ്പേർ പരാതിയുമായി രം​ഗത്തെത്തിയതിന് പിന്നാലെ സിനിമാ-ടി.വി താരം അലോക് നാഥിനെ താര സംഘടനയായ സിനി & ടി.വി ആര്‍ട്ടിസ്റ്റ്സ് അസോസിയേഷനില്‍ (സിന്റ) പുറത്താക്കി. നിരവധി യുവതികൾ താരത്തിനെതിരെ ആരോപണമുന്നയിച്ച് രം​ഗത്തെത്തിയ സാഹചര്യത്തിലാണ് നടപടി. നടപടി സംബന്ധിച്ച വിവരങ്ങൾ സിന്റയുടെ ഔദ്യോ​ഗിക ട്വിറ്റർ പേജിലൂടെ പങ്കുവച്ചു. 

അലോകിനെതിരെ ലൈംഗികാരോപണവും മോശം പെരുമാറ്റവും ആരോപിച്ച് നിരവധി പരാതികൾ ലഭിച്ച സാഹചര്യത്തിൽ എക്സിക്യൂട്ടിവ് കമ്മിറ്റി അദ്ദേഹത്തെ സംഘടനയില്‍ നിന്നും പുറത്താക്കാന്‍ തീരുമാനിച്ചെന്നാണ് നടപടിക്ക് സംഘടന ട്വിറ്ററിൽ നൽകിയി‌രിക്കുന്ന വിശദീകരണം. താരത്തിനെതിരെ ആരോപണമുന്നയിച്ച തി​ര​ക്ക​ഥാ​കൃ​ത്തും സം​വി​ധാ​യ​ക​യു​മാ​യ വി​ന്‍റ ന​ന്ദ​യും അലോക് നാഥും ഉ​ൾ​പ്പെ​ടു​ന്ന ഒരു വി​ശ​ദീ​ക​ര​ണ യോ​ഗം സം​ഘ​ട​ന ഒരുക്കിയിരുന്നെങ്കിലും അലോക് യോ​ഗത്തിൽ പങ്കെടുത്തില്ല. തുടർന്ന് എക്സിക്യൂട്ടീവ് യോ​ഗത്തിൽ താരത്തെ പുറത്താക്കാൻ തീരുമാനിക്കുകയായിരുന്നു. 

അടുത്ത വർഷം മെയ് ഒന്നിന് ചേരുന്ന സംഘടനയുടെ വാർഷിക ജനറൽ ബോഡി യോ​ഗത്തിലും താരം പങ്കെടുത്തില്ലെന്നിൽ അലോക്കിന്റെ സംഘടന അം​ഗത്വം പൂർണ്ണമായും നഷ്ടപ്പെടുമെന്നാണ് സിന്റെ പ്രതിനിധികൾ അറിയിച്ചത്. വി​ന്‍റ ന​ന്ദയ്ക്ക് പുറമേ ന​ടി സ​ന്ധ്യ മൃ​ദു​ലും പേ​രു വെ​ളി​പ്പെ​ടു​ത്താ​ൻ ആ​ഗ്ര​ഹി​ക്കാ​ത്ത മ​റ്റൊ​രു സ്ത്രീ​യും അലോക് നാഥിനെതിരെ ആരോപണമുന്നയിച്ചിരുന്നു. 20 വ​ര്‍​ഷം മു​മ്പ് അലോക് ലൈം​ഗി​ക​മാ​യി ഉ​പ​ദ്ര​വി​ച്ചെന്നാണ് വിന്റ നന്ദയുടെ ആരോപണം.