'മൂക്കുത്തി കണ്ടില്ല'; മാമാങ്കത്തിലെ ആദ്യഗാനം പുറത്തിറങ്ങി

മമ്മൂട്ടി പ്രധാന വേഷത്തിലെത്തുന്ന എം പദ്മകുമാര്‍ ചിത്രം മാമാങ്കത്തിലെ ആദ്യഗാനം എത്തി. 'മൂക്കുത്തി മൂക്കുത്തി കണ്ടില്ല' എന്നു തുടങ്ങുന്ന ഗാനമാണ് റിലീസ് ചെയ്തിരിക്കുന്നത്. റഫീഖ് അഹമ്മദിന്റെ പരികള്‍ക്ക് എം ജയചന്ദ്രനാണ് സംഗീത സംവിധാനം നിര്‍വഹിച്ചിരിക്കുന്നത്. ശ്രേയ ഘോഷലാണ് ഗാനം ആലപിച്ചിരിക്കുന്നത്.

ഉണ്ണി മുകുന്ദന്‍, സുദേവ് നായര്‍, ഇനിയ, പ്രാചി തെഹ്‌ലാന്‍ എന്നിവരാണ് ഗാനരംഗത്തിലെത്തുന്നത്. കഴിഞ്ഞദിവസമാണ് ചിത്രത്തിന്റെ ഓഡിയോ റിലീസ് നടന്നത്. കാവ്യ ഫിലിം കമ്പനിയുടെ ബാനറില്‍ പ്രവാസി വ്യവസായിയായ വേണു കുന്നപ്പള്ളിയാണ് മാമാങ്കം നിര്‍മിക്കുന്നത്. മലയാളത്തിനു പുറമേ ഹിന്ദി, തമിഴ്, തെലുങ്ക് ഭാഷകളിലും മാമാങ്കം പുറത്തിറക്കുന്നുണ്ട്.

മനോജ് പിള്ളയാണ് ഛായാഗ്രഹണം. ചിത്രത്തില്‍ മമ്മൂട്ടിക്ക് പുറമേ ഉണ്ണി മുകുന്ദന്‍, സിദ്ധിഖ്, തരുണ്‍ അറോറ, സുദേവ് നായര്‍, മണികണ്ഠന്‍, സുരേഷ് കൃഷ്ണ, മാസ്റ്റര്‍ അച്യുതന്‍ എന്നിവരും അഭിനയിക്കുന്നുണ്ട്. അനു സിതാര, കനിഹ, ഇനിയ എന്നിവരാണ് ചിത്രത്തിലെ നായികമാര്‍.