മലയാളിയുടെ പ്രിയ എഴുത്തുകാരന്‍ എംടിയുടെ രണ്ടാമൂഴം പ്രിയദര്‍ശന്‍ സംവിധാനം ചെയ്യണമെന്ന് ആരാധകര്‍. പ്രിയദര്‍ശന്റെ ഔദ്യോഗിക ഫെയ്‌സ്ബുക്ക് പേജിലൂടെയാണ് ആരാധകരുടെ അഭ്യര്‍ഥന. ദാദാസാഹിബ് ഫാല്‍ക്കെ പുരസ്‌കാരം നേടിയ അമിതാഭ് ബച്ചനെ പ്രശംസിച്ച് പ്രിയദര്‍ശന്‍ കഴിഞ്ഞ ദിവസം ഫെയ്‌സ്ബുക്കില്‍ പോസ്റ്റ് ഇട്ടിരുന്നു. അതിന് താഴെയാണ് ആരാധകര്‍ ആവശ്യമുയര്‍ത്തി കമന്റുകള്‍ ഇട്ടത്.
പ്രിയദര്‍ശന്‍ സംവിധാനം ചെയ്ത്, ബച്ചന്‍ അഭിനയിച്ച ഒരു പരസ്യം പങ്കുവെച്ചുകൊണ്ടായിരുന്നു കുറിപ്പ്. 'ദാദാസാഹിബ് ഫാല്‍ക്കെ പുരസ്‌കാരം കരസ്ഥമാക്കിയ അമിതാഭ് ജിക്ക് എല്ലാവിധ ആശംസകളും. നാല്‍പ്പതിലേറെ പരസ്യങ്ങളില്‍ ഞാന്‍ അദ്ദേഹവുമൊത്ത് ജോലി ചെയ്തിട്ടുണ്ട്... അതിലൊന്ന് ഞാനിവിടെ പങ്കുവെക്കുന്നു. എനിക്കിനി ജീവിതത്തില്‍ രണ്ടു സ്വപ്‌നങ്ങളുണ്ട്. ഒന്ന് അമിതാഭ് ജിക്കൊപ്പം ഒരു സിനിമയില്‍ ജോലി ചെയ്യുകയെന്നതാണ്. മറ്റൊന്ന് ശ്രീ എം ടി വാസുദേവന്‍ നായരുടെ തിരക്കഥ സംവിധാനം ചെയ്യുകയെന്നതും. ഈ രണ്ട് സ്വപ്നങ്ങളും വൈകാതെ നടക്കുമെന്ന് പ്രതീക്ഷിക്കുന്നു...' എന്നായിരുന്നു പ്രിയദര്‍ശന്റെ കുറിപ്പ്.
ഈ പോസ്റ്റിന് ചുവടെയാണ് ആരാധകര്‍ കമന്റുകളിടുന്നത്. ''രണ്ടാമൂഴം ഏറ്റെടുക്കാന്‍ ഏറ്റവും യോഗ്യനായ സംവിധായകന്‍ പ്രിയദര്‍ശന്‍ ആണ്. അമിതാഭ് ബച്ചനെയും ചിത്രത്തില്‍ ഉള്‍പ്പെടുത്തുകയാണെങ്കില്‍ രണ്ട് സ്വപ്നങ്ങളും സാക്ഷാത്ക്കരിക്കപ്പെടും. മലയാള സിനിമക്കും എംടിക്കും മോഹന്‍ലാലിനും ഇന്ത്യന്‍ സിനിമക്കും നല്‍കാവുന്ന ഏറ്റവും വലിയ സമര്‍പ്പണമായിരിക്കുമത്' കമന്റുകളിലൂടെ ആരാധകര്‍ പറയുന്നു.
എം ടി വാസുദേവന്‍ നായരുടെ പ്രശസ്ത നോവലായ രണ്ടാമൂഴം സിനിമയാകാന്‍ പോകുന്നുവെന്ന വാര്‍ത്ത പ്രചരിക്കാന്‍ തുടങ്ങിയിട്ട് നാളേറെയായി. ചിത്രം ശ്രീകുമാര്‍ മേനോന്‍ സംവിധാനം ചെയ്യുമെന്നായിരുന്നു ആദ്യവാര്‍ത്തകള്‍. തുടര്‍ന്ന് എംടി തിരക്കഥ പൂര്‍ത്തിയാക്കി അത് ശ്രീകുമാര്‍ മേനോനെ ഏല്‍പ്പിച്ചു. എന്നാല്‍ ചിത്രീകരണം എപ്പോള്‍ തുടങ്ങുമെന്ന് ഉറപ്പുനല്‍കാത്തതിനാല്‍ തിരക്കഥ തിരികെ വേണമെന്ന ആവശ്യവുമായി എംടി കോടതിയെ സമീപിച്ചു. സംവിധായകനും നിര്‍മാതാക്കളുമായും തര്‍ക്കമായി. വിവാദങ്ങളെത്തുടര്‍ന്ന് രണ്ടാമൂഴം അനിശ്ചിതത്വത്തിലായ സാഹചര്യത്തിലാണ് ആരാധകര്‍ പ്രിയദര്‍ശനെ സമീപിച്ചിരിക്കുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
