''വിശ്വസിക്കാനാവുന്നില്ല, സഫലമായത് മൂന്ന് വര്‍ഷത്തെ സ്വപ്നം'': ദുല്‍ഖറിനെ കണ്ട സന്തോഷം പങ്കുവെച്ച് അനശ്വര, ചിത്രങ്ങള്‍

ഉദാഹരണം സുജാതയിലെ പത്താം ക്ലാസുകാരിയെ പ്രേക്ഷകര്‍ക്ക് പെട്ടെന്ന് മറക്കാനാവില്ല. ഇപ്പോള്‍ ഏറ്റവുമൊടുങ്ങിലിറങ്ങിയ തണ്ണീര്‍ മത്തന്‍ ദിനങ്ങളിലൂടെ പ്രേക്ഷകരുടെ പ്രിയങ്കരിയായി മാറിയിരിക്കുകയാണ് അനശ്വര രാജന്‍ എന്ന പെണ്‍കുട്ടി. ഈ ചിത്രത്തിലൂടെ നടിക്ക് ഏറെ ആരാധകരെയും സമ്പാദിക്കാനായിട്ടുണ്ട്. 

അതിനോടൊപ്പം തന്നെ വളരെയധികം സന്തോഷിപ്പിച്ച ഒരു കാര്യം പ്രേക്ഷകരോട് പങ്കുവെച്ചിരിക്കുകയാണ് അനശ്വര. നടന്‍ ദുല്‍ക്കര്‍ സല്‍മാനെ നേരിട്ടു കണ്ട സന്തോഷമാണ് നടി സമൂഹമാധ്യമത്തിലൂടെ പങ്കുവച്ചത്.

''എനിക്ക് ഇപ്പോഴും വിശ്വസിക്കാനാവുന്നില്ല. ഈ മനുഷ്യനെ ഞാന്‍ കണ്ടുമുട്ടിയിരിക്കുന്നു! കഴിഞ്ഞ മൂന്ന് വര്‍ഷമായി കൊണ്ടുനടന്നിരുന്ന സ്വപ്‌നം യാഥാര്‍ഥ്യമായിരിക്കുന്നു!'', അനശ്വര ഫേസ്ബുക്കില്‍ കുറിച്ചു. 

കണ്ണൂര്‍ പയ്യന്നൂരിനടുത്ത് കരിവെള്ളൂര്‍ സ്വദേശിയും പയ്യന്നൂര്‍ സെന്റ് മേരീസ് ഗേള്‍സ് ഹയര്‍സെക്കന്‍ഡറി സ്‌കൂളിലെ വിദ്യാര്‍ഥിയുമാണ് അനശ്വര രാജന്‍. ബിജു മേനോന്‍-ജിബു ജേക്കബ് ചിത്രം ആദ്യരാത്രിയാണ് താരത്തിന്റെ ഇറങ്ങാനിരിക്കുന്ന ചിത്രം.