ശ്വാസതടസത്തെ തുടര്‍ന്ന് സംവിധായിക സഞ്ജന റെഡ്ഡി ആശുപത്രിയില്‍; ആരോഗ്യനിലയില്‍ പുരോഗതി

തെലുങ്ക് സംവിധായിക സഞ്‍ജന റെഡ്ഡിയെ ആശുപത്രിയില്‍ പ്രവേശിപ്പിച്ചു. പെട്ടെന്നുണ്ടായ ശ്വാസതടസത്തേയും പനിയേയും തുടർന്ന് വീട്ടിൽ ബോധരഹിതയായി വീണതിനെ തുടർന്നാണ് ചികിത്സ തേടിയത്. ഹൈദരാബാദിലെ സ്വകാര്യ ആശുപത്രിയിലാണ് സഞ്‍ജനയെ പ്രവേശിപ്പിച്ചിരിക്കുന്നത്. സഞ്ജന ആരോ​ഗ്യനില വീണ്ടെടുക്കുന്നുണ്ടെന്നാണ് പുറത്തുവരുന്ന റിപ്പോർട്ടുകൾ.

സ‍ഞ്ജനയെ ആശുപത്രിയിൽ പ്രവേശിപ്പിച്ചതിന് പിന്നാലെ പല അഭ്യൂഹങ്ങളും പ്രചരിപ്പിക്കപ്പെട്ടിരുന്നു. തലച്ചോറിൽ രക്തം കട്ടപിടിച്ചിരിക്കുകയാണെന്നും സ്ഥിതി ​ഗുരുതരമാണെന്നുമായിരുന്നു റിപ്പോർട്ടുകൾ. എന്നാൽ ഇതെല്ലാം വ്യാജ വാര്‍ത്തകളാണെന്നും സഞ്ജനയുടെ ആരോഗ്യസ്ഥിതി തൃപ്തികരമാണെന്നും വ്യക്തമാക്കിക്കൊണ്ട് നിര്‍മാതാവ് കൊന വെങ്കട്ട് രംഗത്തെത്തി. സഞ്ജനയെ വൈറല്‍ ഫീവറിന് ചികിത്സിക്കുകയാണെന്നുമാണ് പറഞ്ഞത്. രണ്ടോ മൂന്നോ ദിവസത്തിനുള്ളിൽ ആശുപത്രി വിടാനാകുമെന്നും പറഞ്ഞു.

രാജു ഗഡുവെന്ന സിനിമയിലൂടെയാണ് സഞ്‍ജന റെഡ്ഡി സംവിധായികയായത്. ഒളിമ്പിക്സില്‍ ആദ്യമായി മെഡല്‍ നേടിയ ഇന്ത്യൻ വനിതയായ കര്‍ണ്ണം മല്ലേശ്വരിയുടെ ജീവിത കഥ പറയുന്ന സിനിമയാണ് അടുത്തതായി സഞ്‍ജന റെഡ്ഡി സംവിധാനം ചെയ്യുന്നത്.