സത്യനാരായൺ പൂജ നടത്തി റാണയും മിഹീകയും; ചിത്രങ്ങൾ

വിവാഹമേളങ്ങൾ അവസാനിച്ചതോടെ നടൻ റാണ ദഗ്ഗുഭട്ടിയും ഭാര്യ മിഹീകയും ഒന്നിച്ച് സത്യനാരായൺ പൂജ നടത്തി. ഇരുവരും കൈകൾ കൂപ്പി പ്രാർത്ഥിക്കുന്ന ചിത്രം പുറത്തുവന്നു. വിവാഹ ചടങ്ങുകൾക്ക് ശേഷം സാധാരണയായി നടത്താറുള്ള ഒരു പൂജയാണ് ഇത്. ആരോഗ്യത്തിനും ഐശ്വര്യത്തിനുമായി ഭഗവാൻ വിഷ്ണുവിനോട് പ്രാർത്ഥിക്കുകയാണ് ചടങ്ങുകളിൽ ചെയ്യുന്നത്.

പരമ്പരാഗത വേഷമായ മുണ്ടും ഷർട്ടുമാണ് പൂജയുടെ സമയം റാണ ധരിച്ചിരുന്നത്. സിൽക് സാരിയായിരുന്നു മിഹീകയുടെ വേഷം. ഒരുപാട് എംബ്രോയിഡറി വർക്കുകൾ നിറഞ്ഞ ഒരു ഷോളും നവവധു അണിഞ്ഞിരുന്നു. അടുത്ത കുടുംബാംഗങ്ങളും പൂജയിൽ പങ്കെടുത്തു.

ഹൈദരാബാദിൽ വച്ചായിരുന്നു റാണ- മിഹീക വിവാഹചടങ്ങുകൾ നടന്നത്.മുപ്പതിൽ താഴെ അതിഥികൾ മാത്രമാണ് ചടങ്ങുകളിൽ സംബന്ധിച്ചത്. കോവിഡ് മാനദണ്ഡങ്ങൾ പാലിച്ചാണ് ചടങ്ങുകൾ നടന്നത്. എല്ലാ അതിഥികൾക്കും കോവിഡ് ടെസ്റ്റും നടത്തിയിരുന്നു.

റാണയുടെ അടുത്ത ബന്ധുക്കളായ നടി സാമന്ത അകിനേനി, ഭർത്താവും നടനുമായ നാ​ഗ ചെെതന്യ, നടൻ രാം ചരൺ, ഭാര്യ ഉപാസന എന്നിവരും വിവാഹത്തിൽ പങ്കെടുത്തു.

തെലുങ്കു നിർമാതാവ് സുരേഷ് ദഗ്ഗുബാട്ടിയുടെ മകനായ റാണ 2010 ലാണ് സിനിമയിൽ അരങ്ങേറ്റം കുറിച്ചത്. ഡിപ്പാർട്ട്മെന്റ്, ബാഹുബലി, ​ഗാസി അറ്റാക്ക് തുടങ്ങി മുപ്പതോളം ചിത്രങ്ങളിൽ വേഷമിട്ടിട്ടുണ്ട്. ബിസിനസുകാരനായ സുരേഷ് ബജാജിന്റെയും ബണ്ടി ബജാജിന്റെയും മകളാണ് മിഹീക.