റോബോസ്വീപ്പർ വരുന്നു; അബുദാബി ഇനി കൂടുതൽ സുന്ദരമാകും (വിഡിയോ)

അബുദാബി: റോഡുകൾ വൃത്തിയാക്കാനായി ഡ്രൈവറില്ലാ വാഹനം അവതരിപ്പിച്ച് അബുദാബി. റോബോസ്വീപ്പർ എന്നാണ് ഡ്രൈവറില്ലാ വാഹനത്തിന്റെ പേര്. എമിറേറ്റിലെ സ്മാർട്ട് ആൻഡ് ഓട്ടോണമസ് സിസ്റ്റംസ് കൗൺസിലിന്റെ മേൽനോട്ടത്തിൽ ഓട്ടോഗോ എന്ന കമ്പനിയാണ് ​ വാഹനം വികസിപ്പിച്ചെടുത്തത്​. അബൂദബി മുനിസിപ്പാലിറ്റീസ് ആൻഡ് ട്രാൻസ്‌പോർട്ട് വകുപ്പാണ്(ഡി എം ടി) പദ്ധതി നടപ്പിലാക്കുന്നത്.

ആദ്യ ഘട്ടത്തിൽ അബുദാബിയിലെ കോർണിഷ്​ പരിസരത്തെ റോഡുകൾ വൃത്തിയാക്കാൻ ആണ് ഈ വാഹനം ഉപയോഗിക്കുക. സഞ്ചരിക്കേണ്ട പാതയും മറ്റ് വിവരങ്ങളും അടങ്ങുന്ന ഡാറ്റ മുൻകൂട്ടി വാഹനവുമായി ബന്ധിപ്പിച്ചിട്ടുണ്ട്.

അത് കൊണ്ട് തന്നെ അപകമുണ്ടാക്കാതെ നിർദിഷ്ട പാതയിലൂടെ സഞ്ചരിക്കാൻ ഈ വാഹനങ്ങൾക്ക് കഴിയും. മനുഷ്യസഹായമില്ലാതെ റോഡും പരിസരവും വൃത്തിയാക്കാനും അണുമുക്തമാക്കാനും റോബോ സ്വീപ്പറിന് കഴിയും.

നഗര മേഖലയിലെ സാഹചര്യത്തിന്​ അനുസരിച്ച്​ ആണ് റോബോ സ്വീപ്പർ രൂപകൽപ്പന ചെയ്തിരിക്കുന്നത്. അത് കൊണ്ട് തന്നെ മറ്റ് തടസങ്ങൾ ഒന്നുമില്ലാതെ സുരക്ഷിതമായി നഗരം വൃത്തിയാക്കാൻ ഈ റോബോസ്വീപ്പറിന് സാധിക്കും.

മികച്ച പൊതുശുചിത്വം ഉറപ്പാക്കുന്നതിനൊപ്പം ഈ മേഖലയിൽ തൊഴിലാളികളെ ആശ്രയിക്കുന്നത് കുറയ്ക്കാൻ സാധിക്കുമെന്നും അധികൃതർ വ്യക്തമാക്കി. ആദ്യ ഘട്ട പ്രവത്തനം വിജയകരമായാൽ കൂടുതൽ ഇടങ്ങളിലേക്ക് റോബോസ്വീപ്പറിനെ ഉപയോഗിക്കാനാണ് അധികൃതരുടെ ലക്ഷ്യം.