ശൈഖ് ഹമദ് ബിന്‍ ഖലീഫ ആല്‍ഥാനിയുടെ നിര്യാണം; ഖത്തറില്‍ പൊതുഅവധിയും നാല് ദിവസത്തെ ഔദ്യോഗിക ദുഃഖാചരണവും

ദോഹ: ഖത്തര്‍ മുന്‍ ഭരണാധികാരി ശൈഖ് ഹമദ് ബിന്‍ ഖലീഫ ആല്‍ഥാനിയോടുള്ള ആദരസൂചകമായി ഖത്തറില്‍ നാല് ദിവസത്തെ ഔദ്യോഗിക ദുഃഖാചരണം പ്രഖ്യാപിച്ചു. ഇന്ന് മുതല്‍ തന്നെ ദുഃഖാചരണം നിലവില്‍ വന്നതായി അമീരി ദിവാന്‍ അറിയിച്ചു. ദുഃഖാചരണത്തിന്റെ ഭാഗമായി രാജ്യത്തുടനീളം ദേശീയ പതാകകള്‍ പകുതി താഴ്ത്തിക്കെട്ടും.

ജൂലൈ 13 മുതല്‍ രാജ്യത്തെ എല്ലാ മന്ത്രാലയങ്ങള്‍ക്കും സര്‍ക്കാര്‍ ഓഫീസുകള്‍ക്കും പൊതുമേഖലാ സ്ഥാപനങ്ങള്‍ക്കും പൊതുഅവധിയായിരിക്കും. അവധിക്ക് ശേഷം ജൂലൈ 19 ഞായറാഴ്ച ജീവനക്കാര്‍ ജോലിയില്‍ പ്രവേശിക്കണം. ഞായറാഴ്ച മഗ്രിബ് നമസ്‌കാരത്തിന് ശേഷം ഇമാം മുഹമ്മദ് ബിന്‍ അബ്ദുല്‍ വഹാബ് മസ്ജിദില്‍ വെച്ചാണ് ശൈഖ് ഹമദിന്റെ മയ്യത്ത് നമസ്‌കാരം നടക്കുക. തുടര്‍ന്ന് ലുസൈല്‍ ശ്മശാനത്തില്‍ ഭൗതികശരീരം സംസ്‌കരിക്കും.

ഖത്തറിനെ മിഡില്‍ ഈസ്റ്റിലെ ഏറ്റവും ശക്തമായ രാജ്യമാക്കി മാറ്റിയ ഭരണാധികാരിയാണ് ശൈഖ് ഹമദ്. 1995 മുതല്‍ 2013 വരെ നീണ്ട 18 വര്‍ഷക്കാലം ഖത്തറിന്റെ അമീറായിരുന്നു ശൈഖ് ഹമദ് ബിന്‍ ഖലീഫ ആല്‍ഥാനി. 2013-ല്‍ മകനും നിലവിലെ അമീറുമായ ശൈഖ് തമീം ബിന്‍ ഹമദ് ആല്‍ഥാനിക്ക് ഭരണം കൈമാറുന്നത് വരെ അദ്ദേഹം ഖത്തറിനെ നയിച്ചു. 'അല്‍ ജസീറ' സ്ഥാപിച്ചതും, 2022-ലെ ഫിഫ ലോകകപ്പിന് ഖത്തറിന് ആതിഥേയത്വം വഹിക്കാനുള്ള അവസരം ഒരുക്കിയതും ശൈഖ് ഹമദിന്റെ ദീര്‍ഘവീക്ഷണമാണ്. 2006-ലെ ഏഷ്യന്‍ ഗെയിംസ്, 2012-ലെ യുഎന്‍ കാലാവസ്ഥാ വ്യതിയാന സമ്മേളനം, ചരിത്രപരമായ വിവിധ രാജ്യാന്തര സമാധാന കരാറുകള്‍ എന്നിവയും അദ്ദേഹത്തിന്റെ ഭരണകാലത്താണ് ഖത്തറില്‍ നടന്നത്.