ഷെയ്ഖ് മുഹമ്മദ് ബിൻ സാലിം അൽ ഖാസിമി അന്തരിച്ചു; മൂന്ന് ദിവസത്തെ ദുഃഖാചരണം

ഷാർജ: ഷാർജ ഡെപ്യൂട്ടി ഭരണാധികാരി ഷെയ്ഖ് അബ്ദുല്ല ബിൻ സാലിം ബിൻ സുൽത്താൻ അൽ ഖാസിമി, ഷെയ്ഖ് അബ്ദുറഹ്മാൻ ബിൻ സാലിം ബിൻ സുൽത്താൻ അൽ ഖാസിമി എന്നിവരുടെ സഹോദരൻ ഷെയ്ഖ് മുഹമ്മദ് ബിൻ സാലിം ബിൻ സുൽത്താൻ അൽ ഖാസിമി നിര്യാതനായി.വിയോഗത്തെ തുടർന്ന് എമിറേറ്റിൽ വെള്ളിയാഴ്ച മുതൽ മൂന്ന് ദിവസത്തെ ഔദ്യോഗിക ദുഃഖാചരണം പ്രഖ്യാപിച്ചു.

ജനാസ നമസ്കാരം വെള്ളിയാഴ്ച അസർ നമസ്കാരത്തിന് ശേഷം ഷാർജയിലെ പ്രശസ്തമായ കിങ് ഫൈസൽ പള്ളിയിൽ നടക്കും. തുടർന്ന് മയ്യിത്ത് അൽ ജുബൈൽ ഖബർസ്ഥാനിൽ ഖബറടക്കും. പരേതന്റെ വേർപാടിൽ അനുശോചനം അറിയിക്കാൻ എത്തുന്ന പുരുഷന്മാർക്കായി അൽ ബദീഇലുള്ള ഷെയ്ഖ് അബ്ദുല്ല ബിൻ സാലിം അൽ ഖാസിമിയുടെ വസതിയിലും, സ്ത്രീകൾക്കായി അൽ തർഫയിലെ പരേതന്റെ വസതിയിലും സൗകര്യങ്ങൾ ഏർപ്പെടുത്തിയിട്ടുണ്ട്. ശനിയാഴ്ച മുതൽ തുടർച്ചയായി മൂന്ന് ദിവസങ്ങളിലായിരിക്കും അനുശോചനങ്ങൾ സ്വീകരിക്കുകയെന്നും കൊട്ടാരം പുറത്തിറക്കിയ അറിയിപ്പിൽ വ്യക്തമാക്കി.