വീണ്ടും കുഴല്‍ക്കിണര്‍ അപകടം; മൂന്ന് വയസുകാരന്‍ 200 അടി താഴ്ചയിലേക്ക് വീണു, രക്ഷാപ്രവര്‍ത്തനം തുടരുന്നു

ഭോപ്പാല്‍: മധ്യപ്രദേശില്‍ 200 അടി താഴ്ചയുള്ള കുഴല്‍ക്കിണറില്‍ മൂന്ന് വയസ്സുകാരന്‍ വീണു. രക്ഷാപ്രവര്‍ത്തനം തുടരുന്നു. കരസേനയും രക്ഷാപ്രവര്‍ത്തനത്തില്‍ പങ്കാളിയാണ്.

മധ്യപ്രദേശ് നിവാരി ജില്ലയിലെ ബാര്‍ഹോ ബുജുര്‍ഗ്  ഗ്രാമത്തിലാണ് സംഭവം. ഹരികിഷന്റെ മകന്‍ പ്രഹ്ലാദ് ആണ് വീണത്. അഞ്ച് ദിവസം മുമ്പാണ് കുഴല്‍ക്കിണര്‍ കുഴിച്ചത്. വയലില്‍ കളിച്ചുകൊണ്ടിരിക്കെയായിരുന്നു അപകടം. കുഴല്‍ക്കിണര്‍ വീട്ടുപകരണം ഉപയോഗിച്ച് മൂടിയിരുന്നു. ഇത് മാറ്റി കളിക്കുന്നിനിടെ, കുട്ടി അബദ്ധവശാല്‍ കുഴല്‍ക്കിണറില്‍ വീണതാകാമെന്നാണ് നിഗമനം.

200 അടി താഴ്ചയുള്ള കിണറില്‍ 100 അടിയെത്തിയപ്പോഴേക്കും വെള്ളം കിട്ടിയിരുന്നു. കുട്ടി എത്ര താഴ്ചയിലാണ് ഉള്ളതെന്ന് മനസ്സിലായിട്ടില്ലെന്ന് പ്രിഥിപുര്‍ പൊലീസ് സ്‌റ്റേഷന്‍ ഇന്‍ ചാര്‍ജ് നരേന്ദ്ര ത്രിപാഠി പറഞ്ഞു.ജില്ലാ അധികാരികള്‍, സൈന്യം, ദുരന്തനിവാരണ സേന, ദേശീയ ദുരന്തനിവാരണ സേന എന്നിവര്‍ സംയുക്തമായാണ് രക്ഷാപ്രവര്‍ത്തനം നടത്തുന്നത്. സമാന്തരമായ കുഴിയെടുത്താണ് കുഞ്ഞിനെ രക്ഷപ്പെടുത്താന്‍ ശ്രമിക്കുന്നത്. സിസിടിവി ക്യാമറ ഉപയോഗിച്ച് കുട്ടി നില്‍ക്കുന്നയിടം വ്യക്തമായിട്ടുണ്ടെന്ന് അധികൃതര്‍ അറിയിച്ചു. നേരത്തെ കുട്ടി രക്ഷാപ്രവര്‍ത്തകരോട് പ്രതികരിച്ചിരുന്നെങ്കിലും ഇപ്പോള്‍ പ്രതികരിക്കുന്നില്ലെന്നും അധികൃതര്‍ വ്യക്തമാക്കി.

ഏകദേശം 50-60 അടി താഴ്ചയിലാണ് കുട്ടിയുള്ളതെന്നാണ് രക്ഷാപ്രവര്‍ത്തകരുടെ നിഗമനം. രക്ഷാപ്രവര്‍ത്തകര്‍ സംഭവസ്ഥലത്തെത്താന്‍ വൈകിയെന്ന് കുട്ടിയുടെ കുടുംബം ആരോപിച്ചു. മുഖ്യമന്ത്രി ശിവരാജ് സിംഗ് ചൗഹാന്റെ അഭ്യര്‍ത്ഥന പ്രകാരമാണ് സൈന്യം രക്ഷാപ്രവര്‍ത്തനത്തിനെത്തിയത്.