അസമിൽ ബിജെപി ഭരണം ഉറപ്പിച്ചു; 19 സീറ്റുകളിൽ വിജയം, 63 ഇടങ്ങളിൽ ലീഡ്; പ്രതിപക്ഷ നിര തകർന്നു

അസം നിയമസഭാ തിരഞ്ഞെടുപ്പിൽ ഭരണത്തുടർച്ച ഉറപ്പാക്കി ബിജെപി മുന്നേറുന്നു. ഏറ്റവും പുതിയ കണക്കുകൾ പ്രകാരം 19 സീറ്റുകളിൽ വിജയിച്ച ബിജെപി 63 സീറ്റുകളിൽ ലീഡ് തുടരുകയാണ്. ഇതോടെ സഖ്യകക്ഷികളുടെ സഹായമില്ലാതെ തന്നെ ഭൂരിപക്ഷം തികയ്ക്കാൻ ബിജെപിക്ക് സാധിക്കും. പ്രധാന പ്രതിപക്ഷമായ കോൺഗ്രസിന് 20 സീറ്റുകളിൽ മാത്രമേ ലീഡ് ഉയർത്താൻ സാധിച്ചിട്ടുള്ളു.

പ്രാദേശിക കക്ഷിയായ ബോഡോ ലാൻഡ് പീപ്പിൾസ് ഫ്രണ്ട് ഒരു സീറ്റിൽ വിജയം ഉറപ്പിക്കുകയും ഒമ്പത് സീറ്റുകളിൽ ലീഡ് ചെയ്യുകയും ചെയ്യുന്നുണ്ട്. സഖ്യകക്ഷിയായ അസം ഗണ പരിഷത്ത് ഒമ്പതിടത്ത് മുന്നേറ്റം തുടരുന്നു. എഐയുഡിഎഫ് ഒരു സീറ്റിൽ വിജയിച്ചു. മുഖ്യമന്ത്രി ഹിമന്ത ബിശ്വ ശർമ്മയുടെ നേതൃത്വത്തിലുള്ള ഭരണത്തിന് ജനങ്ങൾ നൽകിയ ശക്തമായ പിന്തുണയാണ് ഈ ഫലം സൂചിപ്പിക്കുന്നത്. പ്രമുഖ പ്രതിപക്ഷ നേതാക്കളെല്ലാം വൻ മാർജിനിൽ പിന്നിലായതോടെ അസമിൽ ബിജെപി ഹാട്രിക് വിജയത്തിലേക്ക് കുതിക്കുകയാണ്.

പ്രതിപക്ഷ നേതാക്കളുടെ തകർച്ചയും ഭരണകക്ഷി മന്ത്രിമാരുടെ വൻ വിജയവും അസമിലെ രാഷ്ട്രീയ ഭൂപടത്തിൽ വലിയ മാറ്റങ്ങൾക്കാണ് വഴിതുറക്കുന്നത്. വരും മണിക്കൂറുകളിൽ അന്തിമ ഫലം പുറത്തുവരുമ്പോൾ ബിജെപി സഖ്യം ചരിത്ര വിജയം കുറിക്കുമെന്നാണ് രാഷ്ട്രീയ നിരീക്ഷകർ കരുതുന്നത്. മണ്ഡല പുനർനിർണ്ണയത്തിന് ശേഷം നടന്ന ആദ്യ തിരഞ്ഞെടുപ്പിൽ തന്നെ ഇത്തരമൊരു വിജയം നേടാനായത് ഭരണപക്ഷത്തിന്റെ തന്ത്രപരമായ നീക്കങ്ങളുടെ വിജയമായാണ് കണക്കാക്കപ്പെടുന്നത്.

അസമിലെ രാഷ്ട്രീയ ചരിത്രത്തിലെ തന്നെ വലിയൊരു തകർച്ചയിലേക്കാണ് പ്രതിപക്ഷ സഖ്യം നീങ്ങുന്നത്. ശിവസാഗർ ജില്ലയിലെ നസീറ മണ്ഡലത്തിൽ മത്സരിക്കുന്ന പ്രതിപക്ഷ നേതാവ് ദേബബ്രത സൈകിയ രണ്ടാം റൗണ്ട് പിന്നിടുമ്പോൾ 4,967 വോട്ടുകൾക്ക് പിന്നിലാണ്. ഇവിടെ ബിജെപി സ്ഥാനാർത്ഥി മയൂർ ബോർഗോഹൈൻ 11,607 വോട്ടുകൾ നേടിയപ്പോൾ സൈകിയയ്ക്ക് 6,640 വോട്ടുകൾ മാത്രമേ നേടാനായുള്ളൂ.

ശിവസാഗർ സീറ്റ് നിലനിർത്താൻ ഇറങ്ങിയ റൈജോർ ദൾ അധ്യക്ഷനും സിറ്റിംഗ് എംഎൽഎയുമായ അഖിൽ ഗൊഗോയിക്കും ആദ്യ റൗണ്ടുകളിൽ തിരിച്ചടിയാണ് നേരിടുന്നത്. ബിജെപിയുടെ കുശാൽ ദോവാരി 5,171 വോട്ടുകൾ നേടിയപ്പോൾ അഖിൽ ഗൊഗോയിക്ക് 3,262 വോട്ടുകൾ മാത്രമാണ് പോൾ ചെയ്യാനായത്. എൻഡിഎ സഖ്യകക്ഷിയായ എജിപിയുടെ പ്രദീപ ഹസാരികയും ഈ മണ്ഡലത്തിൽ നിർണ്ണായക വോട്ടുകൾ പിടിക്കുന്നുണ്ട്. അസം ജാതീയ പരിഷത്ത് (എജെപി) അധ്യക്ഷൻ ലുറിൻജ്യോതി ഗൊഗോയിയും തന്റെ ബിജെപി എതിരാളിയേക്കാൾ പിന്നിലാണെന്നാണ് ഔദ്യോഗിക കണക്കുകൾ വ്യക്തമാക്കുന്നത്.

ജഗദീഷ് ഭൂയാൻ, രാജേൻ ഗോഹെയ്ൻ തുടങ്ങിയ മുതിർന്ന നേതാക്കളും വോട്ടെണ്ണലിന്റെ വിവിധ ഘട്ടങ്ങളിൽ തങ്ങളുടെ മണ്ഡലങ്ങളിൽ പിന്നിലാണ്. ഭരണവിരുദ്ധ വികാരം വോട്ടായി മാറുമെന്ന് പ്രതീക്ഷിച്ചിരുന്ന പ്രതിപക്ഷത്തിന്, മണ്ഡല പുനർനിർണ്ണയത്തിന് ശേഷമുള്ള പുതിയ രാഷ്ട്രീയ സമവാക്യങ്ങൾ വലിയ വെല്ലുവിളിയാണ് ഉയർത്തിയിരിക്കുന്നത്. ബിജെപിയുടെ ചിട്ടയായ പ്രചാരണവും വികസന മുദ്രാവാക്യങ്ങളും പ്രതിപക്ഷത്തിന്റെ കോട്ടകളിൽ പോലും വിള്ളലുണ്ടാക്കിയതായാണ് നിലവിലെ ട്രെൻഡുകൾ നൽകുന്ന സൂചന.

English Summary: BJP crosses majority mark, likely to form government in Assam once again. The NDA was leading in 88 constituencies, while the Opposition alliance was leading in only 23. The required majority to form a government is 64.