എന്‍ഡിഎ മുന്നേറ്റത്തിലും പിടിച്ച് നിന്ന് ഒവൈസിയുടെ എഐഎംഐഎം; തനിച്ച് മത്സരിച്ച് അഞ്ച് സീറ്റുകളില്‍ ജയം

പട്‌ന: ബിഹാര്‍ നിയമസഭാ തെരഞ്ഞെടുപ്പില്‍ കരുത്ത് തെളിയിച്ച് അസദുദ്ദീന്‍ ഒവൈസിയുടെ ഓള്‍ ഇന്ത്യ മജ്ലിസ്-ഇ-ഇത്തിഹാദുല്‍ മുസ്ലിമീന്‍ (എഐഎംഐഎം). ബിജെപിയുടേയും ജെഡിയുവിന്റെയും നേതൃത്വത്തില്‍ എന്‍ഡിഎ തൂത്തുവാരിയ ബിഹാറില്‍ കോണ്‍ഗ്രസും ജന്‍സുരാജ് പാര്‍ട്ടിയും പതറിവീണപ്പോള്‍ എഐഎംഐഎം പിടിച്ചു നിന്നു. എഐഎംഐഎം അഞ്ച് സീറ്റുകളില്‍ വിജയം നേടി. സിറ്റിങ്ങ് സീറ്റുകളാണ് എഐഎംഐഎം നിലനിര്‍ത്തിയത്.

ജോക്കിഹാട്ട്, ബഹാദൂര്‍ഗണ്‍, കൊച്ചധമാന്‍, അമൂര്‍, ബൈസി മണ്ഡലങ്ങളിലാണ് എഐഎംഐഎം സ്ഥാനാര്‍ത്ഥികള്‍ വിജയിച്ചത്. ബൈസിയിലും കൊച്ചധമാനിലും ഒഴികെയുള്ള മൂന്ന് മണ്ഡലങ്ങളിലും സ്ഥാനാര്‍ഥികള്‍ മുപ്പതിനായിരത്തോളം വോട്ടുകലുടെ ഭൂരിപക്ഷത്തിലാണ് വിജയം നേടിയത്. ശക്തമായ പോരാട്ടത്തിന് ഒടുവിലാണ് മറ്റ് രണ്ട് മണ്ഡലങ്ങളില്‍ എഐഎംഐഎം വിജയം കണ്ടത്.

25 സീറ്റുകളിലാണ് ഇത്തവണ എഐഎംഐഎം മത്സരത്തിനിറങ്ങിത്. അഞ്ച് സീറ്റുകള്‍ വിജയിച്ചതിനൊപ്പം 1.9 ശതമാനം വോട്ടും പാര്‍ട്ടി സ്വന്തമാക്കി. 2020 ലെ ബിഹാര്‍ തെരഞ്ഞെടുപ്പില്‍ ഗ്രാന്‍ഡ് ഡെമോക്രാറ്റിക് സെക്കുലര്‍ ഫ്രണ്ട് സഖ്യത്തിന്റെ ഭാഗമായി എഐഎംഐഎം 20 സീറ്റുകളില്‍ മത്സരിക്കുകയും അമോര്‍, ബൈസി, ജോക്കിഹട്ട്, കൊച്ചാദമാന്‍, ബഹാദൂര്‍ഗന്‍ എന്നിവിടങ്ങളില്‍ വിജയിക്കുകയും ചെയ്തിരുന്നു. ഈ സീറ്റുകളാണ് ഇത്തവണയും നിലനിര്‍ത്തിയത്.

ഇന്ത്യാ ബ്ലോക്കുമായുള്ള സീറ്റ് വിഭജന ചര്‍ച്ചകള്‍ പരാജയപ്പെട്ടതോടെയാണ് എഐഎംഐഎം ഇത്തവണ തനിച്ച് മത്സരിച്ചത്. സഖ്യ ചര്‍ച്ചകള്‍ പരാജയപ്പെട്ടതോടെ 100 സീറ്റുകളില്‍ മത്സരിക്കുമെന്ന് അസദുദ്ദീന്‍ ഒവൈസി പ്രഖ്യാപിച്ചിരുന്നു. ഒടുവില്‍ പാര്‍ട്ടി ഉള്‍പ്പെടെ 25 സ്ഥാനാര്‍ത്ഥികളെയാണ് മത്സര രംഗത്ത് ഇറക്കിയത്. ഇതില്‍ രണ്ട് പേര്‍ മുസ്ലീം ഇതര വിഭാഗത്തില്‍ നിന്നുള്ളവരായിരുന്നു.