'കരുതിക്കൂട്ടിയുള്ള കീഴടങ്ങല്‍'; ഷി ജിന്‍പിങ്ങുമായുള്ള കൂടിക്കാഴ്ചയ്ക്ക് പിന്നാലെ മോദിയെ വിമര്‍ശിച്ച് കോണ്‍ഗ്രസ്

ന്യൂഡല്‍ഹി: ചൈനീസ് പ്രസിഡന്റ് ഷി ജിന്‍പിങ്ങുമായി പ്രധാനമന്ത്രി നരേന്ദ്ര മോദി നടത്തിയ ഉന്നതതല കൂടിക്കാഴ്ചയ്ക്ക് പിന്നാലെ, കേന്ദ്രസര്‍ക്കാരിന്റെ ചൈനീസ് നയത്തിനെതിരെ കോണ്‍ഗ്രസ് രംഗത്ത്. ചൈനയോടുള്ള കേന്ദ്രത്തിന്റെ സമീപനം കരുതിക്കൂട്ടിയുള്ള കീഴടങ്ങലാണെന്ന് കോണ്‍ഗ്രസ് ജനറല്‍ സെക്രട്ടറി ജയറാം രമേശ് ആരോപിച്ചു. രാജ്യത്തിന്റെ സുരക്ഷാ-സാമ്പത്തിക താല്‍പര്യങ്ങളെ ബലി കഴിച്ചുകൊണ്ട് സര്‍ക്കാര്‍ ചൈനയ്ക്ക് മുന്നില്‍ കീഴടങ്ങുകയാണെന്നും പാര്‍ട്ടി കുറ്റപ്പെടുത്തി.

2020 ജൂണ്‍ 19-ന് ഗാല്‍വാന്‍ സംഘര്‍ഷത്തിന് ശേഷം ചൈനീസ് കടന്നുകയറ്റത്തെക്കുറിച്ച് പ്രധാനമന്ത്രി നല്‍കിയ വിവാദപരമായ ക്ലീന്‍ ചിറ്റ് പരാമര്‍ശം ജയറാം രമേശ് വീണ്ടും ഓര്‍മ്മിപ്പിച്ചു. ഇത് ഇന്ത്യയ്ക്ക് തങ്ങളുടെ ഭാഗം വ്യക്തമാക്കാനുള്ള അവസരം ഇല്ലാതാക്കിയതായി കോണ്‍ഗ്രസ് ആരോപിക്കുന്നു. പാകിസ്ഥാനും ചൈനയും തമ്മിലുള്ള സൈനിക സഹകരണങ്ങളെയും അതിര്‍ത്തിയിലെ വെല്ലുവിളികളെയും കുറിച്ച് ചര്‍ച്ചയില്‍ പ്രധാനമന്ത്രി മൗനം പാലിച്ചതിനെ കോണ്‍ഗ്രസ് ചോദ്യം ചെയ്തു. ചൈനയെ ഭീകരവാദത്തിന്റെ ഇരയായി ചിത്രീകരിച്ച പ്രധാനമന്ത്രിയുടെ പരാമര്‍ശത്തെ കോണ്‍ഗ്രസ് പരിഹസിച്ചു.

കിഴക്കന്‍ ലഡാക്കിലെ പരമ്പരാഗത പട്രോളിങ് മേഖലകളില്‍ ഇന്ത്യയുടെ അവകാശങ്ങള്‍ ചോര്‍ന്നുപോയെന്നും, അരുണാചല്‍ അതിര്‍ത്തിയില്‍ ചൈന നടത്തുന്ന കടന്നുകയറ്റങ്ങളെയും സ്ഥലങ്ങളുടെ പേരുമാറ്റുന്ന നടപടികളെയും സര്‍ക്കാര്‍ ഗൗരവമായി കാണുന്നില്ലെന്നും കോണ്‍ഗ്രസ് കുറ്റപ്പെടുത്തി. ബ്രഹ്മപുത്രയിലെ ചൈനയുടെ വലിയ ജലവൈദ്യുത പദ്ധതികള്‍ വടക്കുകിഴക്കന്‍ ഇന്ത്യയുടെ ജലസുരക്ഷയ്ക്ക് ഭീഷണിയാണെന്നും പാര്‍ട്ടി ചൂണ്ടിക്കാണിക്കുന്നു.

ചൈനീസ് കമ്പനികള്‍ക്ക് ഇന്ത്യന്‍ സര്‍ക്കാരിന്റെ കരാറുകളില്‍ പങ്കെടുക്കാനുള്ള വിലക്കുകള്‍ നീക്കാന്‍ സര്‍ക്കാര്‍ ആലോചിക്കുന്നതിനെയും ചൈനീസ് നിക്ഷേപങ്ങള്‍ക്കും തൊഴിലാളികള്‍ക്കും വിസ ഇളവുകള്‍ നല്‍കുന്നതിനെയും കോണ്‍ഗ്രസ് എതിര്‍ത്തു. ഇന്ത്യയുടെ റെക്കോര്‍ഡ് വ്യാപാരക്കമ്മി വര്‍ധിച്ചുകൊണ്ടിരിക്കുന്ന സാഹചര്യത്തില്‍ ഇത്തരം നടപടികള്‍ രാജ്യസുരക്ഷയ്ക്ക് ആപത്താണെന്നും കോണ്‍ഗ്രസ് മുന്നറിയിപ്പ് നല്‍കുന്നു.

ലഡാക്ക് അതിര്‍ത്തിയിലെ ദീര്‍ഘകാല പ്രതിസന്ധികള്‍ക്ക് ശേഷം ഉഭയകക്ഷി ബന്ധം മെച്ചപ്പെടുത്താന്‍ ഇരുരാജ്യങ്ങളും ശ്രമിക്കുന്നുണ്ടെങ്കിലും, ദേശീയ സുരക്ഷയെ പണയം വെച്ചുകൊണ്ടുള്ള നയമാറ്റങ്ങള്‍ക്കെതിരെ പാര്‍ലമെന്റിലും പുറത്തും ശക്തമായ ചോദ്യങ്ങള്‍ ഉന്നയിക്കുമെന്ന് കോണ്‍ഗ്രസ് വ്യക്തമാക്കി.