'രാഹുൽ അലഞ്ഞു നടക്കുന്ന കാള; ആർക്കും ഒരു ഉപകാരവുമില്ല'- വിവാദ പരാമർശവുമായി കേന്ദ്ര മന്ത്രി; പുറത്താക്കണമെന്ന് കോൺ​ഗ്രസ്

ന്യൂഡൽഹി: കോൺഗ്രസ് നേതാവ് രാഹുൽ ഗാന്ധിയെ അധിക്ഷേപിച്ച് കേന്ദ്ര മന്ത്രി. കേന്ദ്രമന്ത്രി റാവുസാഹെബ് ദൻവെ നടത്തിയ പരാമർശമാണ് വിവാദമായത്. ഇതിന് പിന്നാലെ മന്ത്രിയെ പുറത്താക്കണമെന്ന് ആവശ്യപ്പെട്ട് കോൺ​ഗ്രസ് രം​ഗത്തെത്തി. മഹാരാഷ്ട്രയിലെ ഒരു റാലിയിൽ സംസാരിക്കുമ്പോഴാണ് അദ്ദേഹം രാഹുലിനെ അധിക്ഷേപിച്ച് സംസാരിച്ചത്. 

'രാഹുൽ ഗാന്ധിയെക്കൊണ്ട് ആർക്കും ഒരു ഉപകാരവുമില്ല. അദ്ദേഹം ഒരു കാളയെപ്പോലെയാണ്. അദ്ദേഹം എല്ലായിടത്തും അലഞ്ഞു നടക്കുന്നു. കഴിഞ്ഞ 20 വർഷമായി ലോക്‌സഭയിൽ ഇത് കാണുന്നു'– ദൻവെ പറഞ്ഞു.   

ഈ വാക്കുകൾ അപമര്യാദയാണെന്നും ഞെട്ടിക്കുന്നതാണെന്നും കോൺഗ്രസ് വ്യക്തമാക്കി. മന്ത്രിയുടെ വാക്കുകൾ അദ്ദേഹമിരിക്കുന്ന പദവിക്കു ചേരുന്നതല്ലെന്നും മന്ത്രിസഭയിൽ നിന്ന് അദ്ദേഹത്തെ പുറത്താക്കണമെന്നും കോൺഗ്രസ് നേതാക്കൾ ആവശ്യപ്പെട്ടു.