എസ്ഐആർ മൂന്നാം ഘട്ടത്തിലേക്ക്; 19 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി നടപടികൾ ആരംഭിച്ചു

ന്യൂഡൽഹി: രാജ്യത്തെ വോട്ടർപട്ടിക കൂടുതൽ കൃത്യമാക്കുന്നതിന്റെ ഭാഗമായി സ്പെഷ്യൽ ഇൻ്റൻസീവ് റിവിഷൻ (SIR) മൂന്നാം ഘട്ടം കേന്ദ്ര തിരഞ്ഞെടുപ്പ് കമ്മീഷൻ പ്രഖ്യാപിച്ചു. അർഹരായ എല്ലാ വോട്ടർമാരെയും പട്ടികയിൽ ഉൾപ്പെടുത്തുന്നതിനും അനർഹമായ എൻട്രികൾ ഒഴിവാക്കുന്നതിനും വേണ്ടിയാണ് ഈ നടപടിയെന്ന് മുഖ്യ തിരഞ്ഞെടുപ്പ് കമ്മീഷണർ ജ്ഞാനേഷ് കുമാർ അറിയിച്ചു. നിലവിൽ നടന്നുകൊണ്ടിരിക്കുന്ന സെൻസസ് പ്രവർത്തനങ്ങളുമായി ഏകോപിപ്പിച്ചാണ് ഈ ഘട്ടത്തിലെ വോട്ടർപട്ടിക പുതുക്കലും നടക്കുന്നത്.

36 കോടി വോട്ടർമാരിലേക്ക് ബിഎൽഒമാർ എത്തും

മൂന്നാം ഘട്ടത്തിൽ ഏകദേശം 36 കോടി വോട്ടർമാരെയാണ് ലക്ഷ്യമിടുന്നത്. ഇതിനായി 3.94 ലക്ഷത്തിലധികം ബൂത്ത് ലെവൽ ഓഫീസർമാർ (BLO) വീടുതോറുമുള്ള സന്ദർശനം നടത്തും. നേരത്തെ നടന്ന രണ്ട് ഘട്ടങ്ങളിലായി 13 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായി 59 കോടി വോട്ടർമാരെ ഇതിനോടകം തന്നെ ഉൾപ്പെടുത്തിയിട്ടുണ്ട്. പരിശീലനം, വിവരശേഖരണം, കരട് വോട്ടർപട്ടിക പ്രസിദ്ധീകരണം, ആക്ഷേപങ്ങളും പരാതികളും പരിഹരിക്കൽ, അന്തിമ വോട്ടർപട്ടിക പ്രസിദ്ധീകരണം എന്നിങ്ങനെ വിവിധ ഘട്ടങ്ങളിലായാണ് ഈ പ്രക്രിയ പൂർത്തിയാക്കുക.

ഉൾപ്പെടുന്ന സംസ്ഥാനങ്ങളും കേന്ദ്രഭരണ പ്രദേശങ്ങളും

ഡൽഹി, ഒഡീഷ, മിസോറാം, സിക്കിം, മണിപ്പൂർ, ഉത്തരാഖണ്ഡ്, ആന്ധ്രാപ്രദേശ്, അരുണാചൽ പ്രദേശ്, ഹരിയാന, ചണ്ഡിഗഡ്, തെലങ്കാന, പഞ്ചാബ്, കർണാടക, മേഘാലയ, മഹാരാഷ്ട്ര, ജാർഖണ്ഡ്, നാഗാലാൻഡ്, ത്രിപുര എന്നീ സംസ്ഥാനങ്ങളിലും ദാദ്ര ആൻഡ് നഗർ ഹവേലി - ദാമൻ ആൻഡ് ദിയു എന്നീ കേന്ദ്രഭരണ പ്രദേശങ്ങളിലുമാണ് മൂന്നാം ഘട്ടത്തിൽ വോട്ടർപട്ടിക പുതുക്കുന്നത്. അതേസമയം, കാലാവസ്ഥാ വ്യതിയാനങ്ങളും സെൻസസ് പ്രവർത്തനങ്ങളും കണക്കിലെടുത്ത് ഹിമാചൽ പ്രദേശ്, ജമ്മു കശ്മീർ, ലഡാക്ക് എന്നിവിടങ്ങളിലെ പുതുക്കൽ ഷെഡ്യൂൾ പിന്നീട് പ്രഖ്യാപിക്കും.

കേരളത്തിൽ നടപടികൾ പൂർത്തിയായി

കേരളം ഉൾപ്പെടെയുള്ള 13 സംസ്ഥാനങ്ങളിൽ വോട്ടർപട്ടിക പുതുക്കൽ നടപടികൾ ഇതിനോടകം തന്നെ പൂർത്തിയായതായി തിരഞ്ഞെടുപ്പ് കമ്മീഷൻ അറിയിച്ചു. കേരളത്തിന് പുറമെ ഉത്തർപ്രദേശ്, തമിഴ്നാട്, പശ്ചിമ ബംഗാൾ, ബിഹാർ, രാജസ്ഥാൻ, മധ്യപ്രദേശ്, ഗുജറാത്ത്, ചത്തീസ്ഗഡ്, ഗോവ തുടങ്ങിയ സംസ്ഥാനങ്ങളിലാണ് മുമ്പത്തെ ഘട്ടങ്ങളിൽ നടപടികൾ പൂർത്തിയായത്. അസമിൽ പ്രത്യേക പുനഃപരിശോധനയും നടത്തിയിട്ടുണ്ട്. അർഹരായ എല്ലാ വോട്ടർമാരും ഈ പ്രക്രിയയിൽ പങ്കാളികളാകുന്നുണ്ടെന്ന് ഉറപ്പുവരുത്താൻ ബി.എൽ.ഒമാരും രാഷ്ട്രീയ പാർട്ടികളുടെ പ്രതിനിധികളും (BLA) സഹകരിക്കണമെന്നും കമ്മീഷൻ നിർദ്ദേശിച്ചു.