ന്യൂഡല്‍ഹി: കേന്ദ്രസര്‍ക്കാരിന്റെ കാര്‍ഷിക നിയമങ്ങള്‍ക്ക് എതിരായ പ്രക്ഷോഭത്തില്‍ പങ്കെടുക്കാനായി ഡല്‍ഹിയിലേക്ക് തിരിച്ച കര്‍ഷകരും പൊലീസും തമ്മില്‍ യുപി അതിര്‍ത്തിയില്‍ സംഘര്‍ഷം. ഡല്‍ഹി ചലോ മാര്‍ച്ചില്‍ പങ്കെടുക്കാനെത്തിയ ഇരുനൂറോളം കര്‍ഷകരെ യുപി ഗേറ്റ് എന്നറിയപ്പെടുന്ന ഗാസിയാബാദ്-ഡല്‍ഹി ബോര്‍ഡറില്‍ പൊലീസ് തടഞ്ഞു. ബാരിക്കേഡുകള്‍ മറിച്ചിട്ട കര്‍ഷകര്‍ക്ക് നേരെ, പൊലീസ് ലാത്തിചാര്‍ജ് നടത്തി. ഉത്തരാഖണ്ഡില്‍ നിന്നും കര്‍ഷകര്‍ ഡല്‍ഹിയിലേക്ക് തിരിച്ചിട്ടുണ്ട്.
അതേസമയം, പൊലീസ് അനുവദിച്ച നിരാകരി മൈതാനത്തേക്ക് പോകാതെ ഡല്‍ഹി അതിര്‍ത്തികളില്‍ പ്രക്ഷോഭം കടുപ്പിക്കാന്‍ കര്‍ഷക സംഘടനതള്‍ തീരുമാനിച്ചു. ഹരിയാന അതിര്‍ത്തികളായ സിംഗു,തിക്രി എന്നിവിടങ്ങളില്‍ എത്തിയ കര്‍ഷകര്‍ ഇവിടെ തന്നെ തുടരും. മൂന്നുദിവസമായി ഡല്‍ഹിയിലേക്കുള്ള അതിര്‍ത്തികള്‍ പൊലീസ് അടച്ചിരിക്കുകയാണ്.
ഞായറാഴ്ച രാവിലെ പതിനൊന്നു മണിക്ക് യോഗം ചേര്‍ന്ന് മറ്റു പരിപാടികള്‍ എന്തൊക്കെയെന്ന് ആലോചിക്കുമെന്ന് കര്‍ഷക സംഘടനകള്‍ അറിയിച്ചു.
നിരാകരി പാര്‍ക്കിലേക്ക് പോകില്ലെന്നും ജന്തര്‍ മന്ദറില്‍ സമരം ചെയ്യാന്‍ അവസരം ലഭിക്കുന്നതുവരെ അതിര്‍ത്തികളില്‍ തങ്ങുമെന്നും പഞ്ചാബിലെ ഏറ്റവും വലിയ കര്‍ഷക സംഘടനയായ ബികെയു ഉഗ്രഹന്‍ വ്യക്തമാക്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates