റോഡരികിലെ ട്രാൻസ്ഫോർമർ പൊട്ടിത്തെറിച്ചു; സ്കൂട്ടർ യാത്രികരായ അച്ഛനും മകൾക്കും ദാരുണാന്ത്യം 

ബം​ഗളൂരു: റോഡരികിലെ ഇലക്ട്രിക് ട്രാൻസ്ഫോർമർ പൊട്ടിത്തെറിച്ച് പൊള്ളലേറ്റ് ചികിത്സയിലായിരുന്ന അച്ഛനും മകൾക്കും ദാരുണാന്ത്യം. ശിവരാജ് (55), മകൾ ചൈതന്യ(19) എന്നിവരാണ് മരിച്ചത്. സ്കൂട്ടറിൽ സഞ്ചരിച്ചിരുന്ന ഇവരുടെ ദേഹത്തേക്ക് ട്രാൻസ്ഫോർമറിൽ നിന്ന് തീ പടരുകയായിരുന്നു. 

നൈസ് റോഡിൽ മം​ഗനഹ‌ള്ളി പാലത്തിന് സമീപം ബുധനാഴ്ചയാണ് അപകടം നടന്നത്. ചൈതന്യയുടെ വിവാഹ നിശ്ചയ ചടങ്ങിനായി കൺവെൻഷൻ സെന്റർ ബുക് ചെയ്ത് മടങ്ങുകയായിരുന്നു ഇരുവരും. റോഡിലെ കുണ്ടുംകുഴിയും കാരണം വേ​ഗത കുറച്ചാണ് ശിവരാജ് വണ്ടിയോടിച്ചത്. സ്‌ഫോടനത്തെ തുടർന്ന് ട്രാൻസ്‌ഫോർമറിൽ നിന്ന് എണ്ണ തെറിച്ച് ഇരുവർക്കും മാരകമായ പൊള്ളലേറ്റു. ബൈകും കത്തിനശിച്ചു. ശിവരാജ് സംഭവം നടന്ന ബുധനാഴ്ച തന്നെ മരിച്ചിരുന്നു. വ്യാഴാഴ്ച പുലർചെ രണ്ടു മണിയോടെയാണ് ചൈതന്യയുടെ മരണം.

സംഭവത്തിൽ ബം​ഗളൂർ ഇലക്ട്രിസിറ്റി സപ്ലൈ കംപനി ലിമിറ്റഡിന്റെ (ബെസ്‌കോം) എക്സിക്യൂടിവ് എൻജിനീയർക്കും മറ്റ് ഉദ്യോഗസ്ഥർക്കും എതിരെ ക്രിമിനൽ അനാസ്ഥയ്ക്ക് കേസ് രജിസ്റ്റർ ചെയ്തു. ട്രാൻസ്‌ഫോർമറിൽ നിന്ന് ഓയിൽ ചോർച്ച ഉണ്ടെന്ന് പരാതിപ്പെട്ടിട്ടും  നടപടിയെടുക്കാത്തതിനെ തുടർന്നാണ് കേസെടുത്തത്.