ട്രെയിനിൽ തീപിടിത്തം, എൻജിനിലടക്കം ആളിക്കത്തി; കമ്പാർട്ടുമെന്റുകൾ തള്ളി മാറ്റി യാത്രക്കാർ, വിഡിയോ 

ന്യൂഡൽഹി: ഉത്തർപ്രദേശിലെ സഹാറൻപൂരിൽ നിന്ന് ഡൽഹിയിലേക്ക് പോകുകയായിരുന്ന ട്രെയിനിൽ തീപിടിത്തം. ട്രെയിനിന്റെ എൻജിനിലും രണ്ട് കമ്പാർട്ടുമെന്റുകളിലുമാണ് തീപിടിത്തമുണ്ടായത്. മീററ്റിന് സമീപമുള്ള ദൗരാല റെയിൽവേ സ്റ്റേഷനിൽ വച്ചാണ് സംഭവം. 

തീപിടിത്തമുണ്ടായ ഭാ​ഗത്തുനിന്ന് ട്രെയിനിന്റെ മറ്റു കമ്പാർട്ടുമെന്റുകളിലേക്ക് തീ പടരാതിരിക്കാൻ ഇവ തമ്മിൽ വേർപെടുത്താനുള്ള ശ്രമം നടത്തുകയാണ്. യാത്രക്കാർ ചേർന്ന് ട്രെയിൻ തള്ളി ഇരുഭാ​ഗങ്ങളും വേർപെടുത്താൻ ശ്രമിക്കുന്ന വിഡിയോ വാർത്താ ഏജൻസിയായ എഎൻഐ പുറത്തുവിട്ടു. ആളപായമൊന്നും റിപ്പോർട്ട് ചെയ്തിട്ടില്ല.‌ തീപിടിത്തമുണ്ടായതിന്റെ കാരണം വ്യക്തമായിട്ടില്ല.