ന്യൂഡല്‍ഹി: കാര്‍ഷിക നിയമങ്ങള്‍ പിന്‍വലിക്കണമെന്നാവശ്യപ്പെട്ട് കര്‍ഷകര്‍ രാജ്യവ്യാപമായി നടത്തുന്ന സമരത്തിന് ഒരു വയസ്. വിവാദമായ മൂന്ന് കാര്‍ഷിക നിയമങ്ങള്‍ പിന്‍വലിക്കുമെന്ന് കേന്ദ്രസര്‍ക്കാര്‍ അടുത്തിടെ പ്രഖ്യാപിച്ചുവെങ്കിലും താങ്ങുവിലയ്ക്ക് നിയമപരമായ പരിരക്ഷ ഉറപ്പാക്കണമെന്നതടക്കം വിവിധ ആവശ്യങ്ങള്‍ ഉന്നയിച്ച് കര്‍ഷകര്‍ ഇപ്പോഴും സമരപാതയിലാണ്.
കോര്‍പറേറ്റുകളെ സഹായിക്കുന്നതാണ് എന്ന് ആരോപിച്ച് കേന്ദ്രസര്‍ക്കാര്‍ കൊണ്ടുവന്ന മൂന്ന് കാര്‍ഷിക നിയമങ്ങള്‍ക്കെതിരെയാണ് കര്‍ഷകര്‍ രാജ്യമൊട്ടാകെ സംഘടിച്ചത്. കടുത്ത തണുപ്പിനെയും ചൂടിനെയും അവഗണിച്ചാണ് കര്‍ഷകര്‍ തെരുവില്‍ സമരം ചെയ്തത്. സ്ത്രീകളും കുട്ടികളും പ്രായമായവരുമടക്കം നിയമങ്ങള്‍ക്കെതിരെ സമരം രംഗത്തെത്തി. ഈ രീതിയില്‍ മുന്നോട്ടുപോകുന്നത് തിരിച്ചടിയാകുമെന്ന് തിരിച്ചറിഞ്ഞ കേന്ദ്രസര്‍ക്കാര്‍ കര്‍ഷകര്‍ക്ക് മുന്നില്‍ മുട്ടുമടക്കുകയായിരുന്നു.
കര്‍ഷക പ്രക്ഷോഭത്തിന് ഒരു വയസ്
ഗുരുനാനാക് ജയന്തി ദിനത്തില്‍ രാജ്യത്തെ അഭിസംബോധന ചെയ്താണ് വിവാദമായ കാര്‍ഷിക നിയമങ്ങള്‍ പിന്‍വലിക്കുന്നതായുള്ള പ്രഖ്യാപനം മോദി നടത്തിയത്. കഴിഞ്ഞാഴ്ച നിയമങ്ങള്‍ പിന്‍വലിക്കുന്നതിനുള്ള ബില്ലിന് കേന്ദ്രമന്ത്രിസഭായോഗം അംഗീകാരം നല്‍കി. അടുത്ത ആഴ്ച തുടങ്ങുന്ന ശൈത്യകാല സമ്മേളനത്തില്‍ കാര്‍ഷിക നിയമങ്ങള്‍ പിന്‍വലിക്കുന്ന ബില്‍ കൊ്ണ്ടുവരും.
എന്നാല്‍ താങ്ങുവിലയ്ക്ക് നിയമപരമായ പരിരക്ഷ ഉറപ്പാക്കണം എന്നതടക്കം വിവിധ ആവശ്യങ്ങളില്‍ കൂടി തീരുമാനം ആകുന്നത് വരെ സമരവുമായി മുന്നോട്ടുപോകാനാണ് സംയുക്ത കിസാന്‍ മോര്‍ച്ച തീരുമാനിച്ചിരിക്കുന്നത്. ഹരിയാനയില്‍ കര്‍ഷകസമരം ആരംഭിച്ചതിന്റെ ഒന്നാം വാര്‍ഷികത്തില്‍ കിസാന്‍ മഹാപഞ്ചായത്ത് സംഘടിപ്പിച്ചു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
