ഹൈദരാബാദ്: വിവാഹേതര ബന്ധം വെളിപ്പെടുത്തുമെന്ന് പറഞ്ഞ് ഭീഷണിപ്പെടുത്തി യുവതിയെ കൂട്ടബലാത്സംഗത്തിന് ഇരയാക്കിയതായി പരാതി. ഇതിന്റെ മനോവിഷമത്തില്‍ യുവതിയും കാമുകനും ഒറ്റപ്പെട്ട സ്ഥലത്ത് പോയി ആത്മഹത്യക്ക് ശ്രമിച്ചു. കീടനാശിനി കഴിച്ച് ആത്മഹത്യക്ക് ശ്രമിച്ച രണ്ടുപേരും ആശുപത്രിയില്‍ ചികിത്സയിലാണ്. യുവതിയുടെ മൊഴിയുടെ അടിസ്ഥാനത്തില്‍ രണ്ടു പ്രതികളെ പൊലീസ് അറസ്റ്റ് ചെയ്തു.
ഹൈദരാബാദ് എസ്ആര്‍ നഗറില്‍ ഡിസംബര്‍ 13നാണ് സംഭവം. യുവതി പരാതി നല്‍കിയതിനെ തുടര്‍ന്ന് ഡിസംബര്‍ 17നാണ് സംഭവം പുറംലോകം അറിഞ്ഞത്. രണ്ടു പ്രതികളും യുവതിയുടെ അയല്‍വാസികളാണ്. യുവതി നിര്‍മ്മാണ തൊഴിലാളിയാണ്. കൂടെ ജോലി ചെയ്യുന്ന യുവാവുമായി ഇവര്‍ അടുപ്പത്തിലാണ്.
സംഭവദിവസം കാമുകനെ കാണാന്‍ വീട്ടില്‍ നിന്നിറങ്ങിയ യുവതിയെ പ്രതികള്‍ തടഞ്ഞു. കാമുകനുമായുള്ള അടുപ്പം വീട്ടില്‍ പറയുമെന്ന് പറഞ്ഞ് പ്രതികള്‍ ഭീഷണിപ്പെടുത്തി. തുടര്‍ന്ന് ഒഴിഞ്ഞു കിടക്കുന്ന മുറിയിലേക്ക് കൂട്ടിക്കൊണ്ടുപോയി ഇരുവരും ചേര്‍ന്ന് യുവതിയെ ബലാത്സംഗം ചെയ്തു എന്നാണ് പരാതി. പിറ്റേന്ന് യുവതിയും കാമുകനും ഒറ്റപ്പെട്ട സ്ഥലത്തേയ്ക്ക് പോയി. തുടര്‍ന്ന് ആത്മഹത്യ ചെയ്യാന്‍ തീരുമാനിക്കുകയായിരുന്നുവെന്ന് പൊലീസ് പറയുന്നു.
കീടനാശിനി കഴിച്ച് അബോധാവസ്ഥയിലാകുന്നതിന് മുന്‍പ് കാമുകനാണ് കുടുംബത്തെ വിവരം അറിയിച്ചത്. ഉടനെ തന്നെ ഇരുവരെയും ആശുപത്രിയില്‍ പ്രവേശിപ്പിച്ചു. വെള്ളിയാഴ്ച ബോധം വന്ന യുവതിയുടെ മൊഴിയുടെ അടിസ്ഥാനത്തിലാണ് രണ്ടുപ്രതികളെയും അറസ്റ്റ് ചെയ്തത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
