ബംഗളൂരു അപകടം; കര്ണാടക ക്രിക്കറ്റ് അസോസിയേഷന് ഭാരവാഹികളുടെ അറസ്റ്റ് തടഞ്ഞ് ഹൈക്കോടതി
ബംഗളൂരു: ബെംഗളൂരു ചിന്നസ്വാമി സ്റ്റേഡിയത്തിലെ ആള്ക്കൂട്ട ദുരന്തവുമായി ബന്ധപ്പെട്ട കേസില് കര്ണാടക ക്രിക്കറ്റ് അസോസിയേഷന് ഭാരവാഹികളുടെ അറസ്റ്റ് തടഞ്ഞ് കര്ണാടക ഹൈക്കോടതി(Karnataka High Court). കര്ണാടക ക്രിക്കറ്റ് അസോസിയേഷന് ഭാരവാഹികള്ക്കെതിരെ അറസ്റ്റ് ഉള്പ്പെടെയുള്ള നടപടികള് പാടില്ലെന്നും ഹൈക്കോടതി ഉത്തരവിട്ടു.
കര്ണാടക ക്രിക്കറ്റ് അസോസിയേഷന് ഭാരവാഹികള് അന്വേഷണവുമായി സഹകരിക്കണമെന്നും ഹൈക്കോടതി വ്യക്തമാക്കി. ജസ്റ്റിസ് എസ് ആര് കൃഷ്ണകുമാറിന്റെ ബെഞ്ചിന്റേതാണ് ഉത്തരവ്. കെഎസ്സിഎ പ്രസിഡന്റ് എ രഘുറാം ഭട്ട് അടക്കമുള്ളവരാണ് ഹര്ജി നല്കിയത്.
ജൂണ് 16ന് കേസ് വീണ്ടും പരിഗണിക്കും. അതേസമയം, ആര്സിബി മാര്ക്കറ്റിങ് വിഭാഗം മേധാവി നിഖില് സോസലെയുടെ അറസ്റ്റില് തല്ക്കാലം ഇടപെടുന്നില്ലെന്ന് കര്ണാടക ഹൈക്കോടതി വ്യക്തമാക്കി. സംസ്ഥാന സര്ക്കാരിന് പറയാനുള്ളത് കേള്ക്കണമെന്നും കോടതി വ്യക്തമാക്കുകയായിരുന്നു.
അറസ്റ്റ് നിയമവിരുദ്ധമെന്ന് ചൂണ്ടിക്കാട്ടിയാണ് നിഖില് സോസലെ ഹൈക്കോടതിയില് നല്കിയ ഹര്ജിയില് പറയുന്നത്. പൊലീസ് പ്രാഥമിക അന്വേഷണം പോലും നടത്തിയില്ലെന്നും ദുരന്തത്തിന്റെ ഉത്തരവാദിത്തം ആര്സിബിക്ക് മേല് മാത്രം കെട്ടിവെക്കാനാണ് സര്ക്കാര് ശ്രമമെന്നും നിഖില് സോസലെ കോടതിയില് വ്യക്തമാക്കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
