കേന്ദ്ര സര്‍ക്കാര്‍ ജീവനക്കാരുടെ എച്ച്ആര്‍എയില്‍ വര്‍ധന; കൂട്ടിയത് 1-3 ശതമാനം

ന്യൂഡൽഹി: കേന്ദ്ര സർക്കാർ ജീവനക്കാരുടെ വീട്ടുവാടക അലവൻസ് (എച്ച്ആർഎ) വർധിപ്പിച്ചു. 1– 3% കൂട്ടി. എക്സ്, വൈ, സെഡ് നഗരങ്ങളിൽ എച്ച്ആർഎ യഥാക്രമം അടിസ്ഥാന ശമ്പളത്തിന്റെ 27, 18, 9 ശതമാനം വീതമാക്കിയാണ് ഉയർത്തിയിരിക്കുന്നത്. 

നിലവിൽ ‌24,16, 8 % ആണ്. 5400, 3600, 1800 രൂപ വീതമായിരിക്കും ഇനി കുറഞ്ഞ തുകയെന്നും ധനമന്ത്രാലയത്തിന്റെ ഉത്തരവിൽ പറയുന്നു. ഏഴാം ശമ്പളക്കമ്മിഷൻ പ്രകാരം ഡിഎ 25 % കടക്കുമ്പോഴുള്ള വർധനയാണിത്. 

ഡിഎ 50 % കടക്കുമ്പോൾ എച്ച്ആർഎ 30, 20, 10 % വീതമാകും. തിരുവനന്തപുരം, കൊല്ലം, കൊച്ചി, തൃശൂർ, മലപ്പുറം, കോഴിക്കോട്, കണ്ണൂർ ജില്ലകളാണ് കേരളത്തിൽ  ‘വൈ’ വിഭാഗത്തിലുള്ളത്. ബാക്കിയുള്ളവ ‘സെഡ്’ വിഭാഗത്തിലാണ്. 

രാജ്യത്ത് ഡൽഹി, ഗ്രേറ്റർ മുംബൈ, ചെന്നൈ, കൊൽക്കത്ത, ബെംഗളൂരു, ഹൈദരാബാദ്, പുണെ, അഹമ്മദാബാദ് എന്നിവയാണ് ‘എക്സ്’ വിഭാഗത്തിലുള്ളത്.