പാത്രം കഴുകാൻ പറഞ്ഞതിന് അടുക്കളയിലിരുന്ന കത്തിയെടുത്ത് കുത്തിക്കൊന്നു; യുവാവ് അറസ്റ്റിൽ 

പൂനെ: പാത്രം കഴുകാൻ പറഞ്ഞതിന് ഒരുമിച്ച് താമസിക്കുന്നയാളെ കുത്തി കൊലപ്പെടുത്തിയ യുവാവ് അറസ്റ്റിൽ. ഒഡീഷയിലെ കട്ടക്ക് ജില്ലക്കാരനായ അനിൽകുമാർ ശരത്കുമാർ ദാസ് ആണ് അറസ്റ്റിലായത്. ഒഡീഷയിലെ ദേൻകനാൽ സ്വദേശിയായ അമർ ബസന്ത് മഹോപാത്രയാണ് (28) മരിച്ചത്. 

പൂനെയിൽ വെള്ളിയാഴ്ച രാത്രിയാണ് സംഭവമുണ്ടായത്.‌ രാവിലെ മുതൽ കഴുകാതെ കിടക്കുന്ന പാത്രം വൃത്തിയാക്കാനാണ് മഹോപാത്ര ദാസിനോട് പറഞ്ഞത്. ഇതുകേട്ട് ദേഷ്യപ്പെട്ട ദാസ് അടുക്കളയിലുണ്ടായിരുന്ന കത്തിയെടുത്ത് കുത്തുകയായിരുന്നു. നെഞ്ചിന്റെ ഇടത് ഭാഗത്ത് ആഴത്തിലേറ്റ കുത്താണ് മരണകാരണമെന്ന് പൊലീസ് പറഞ്ഞു. 

ഇരുവരെയും കൂ​ടാതെ മുറിയിൽ താമസിക്കുന്ന മൂന്നാമത്തെയാളാണ് സംഭവം പൊലീസിലറിയിച്ചത്. പൂനെയിൽ ബാർബർമാരായ ​ജോലി ചെയ്യുകയാണ് മൂന്നുപേരും.