പാഞ്ഞെത്തിയ ട്രെയിൻ പെട്ടെന്ന് ബ്രേക്ക് പിടിച്ചു, ട്രാക്കിൽ കിടന്ന ആൾ രക്ഷപെട്ടത് തലനാരിഴയ്ക്ക്; വിഡിയോ 

മുംബൈ: റെയിൽവേ ട്രാക്കിൽ പാഞ്ഞെത്തിയ ട്രെയിനിന് മുന്നിൽ നിന്ന് കഷ്ടിച്ച് രക്ഷപെട്ട ഒരാളുടെ വിഡിയോണ് സോഷ്യൽ മീഡിയയിൽ ശ്രദ്ധ നേടുന്നത്. ട്രാക്കിൽ കിടക്കുകയായിരുന്ന വ്യക്തിയുടെ തൊട്ടടുത്തുവച്ച് ലോക്കോ പൈലറ്റ് എമർജൻസി ബ്രേക്കിട്ടതാണ് രക്ഷയായത്. മുംബൈയിലെ ശിവദി സ്റ്റേഷനിൽ നിന്നുള്ള വിഡിയോയാണ് വൈറലായിരിക്കുന്നത്. 

റെയിൽവേ ട്രാക്കിലൂടെ മന്ദഗതിയിൽ നടന്നുനീങ്ങുന്ന ആളെയാണ് വിഡിയോ തുടങ്ങുമ്പോൾ കാണുക. ഇയാൾ പിന്നീട് ട്രാക്കിൽ കിടക്കുന്നത് കാണാം. ഈ സമയമാണ് ഒരു ട്രെയിൻ പാഞ്ഞുവരുന്നത്. എന്നാൽ ട്രാക്കിൽ കുടന്ന ആളുടെ സമീപത്തെത്തിയപ്പോൾ ട്രെയിൻ പെട്ടെന്ന് നിന്നു. ഈ സമയം ചില ഉദ്യോഗസ്ഥർ ട്രാക്കിൽ കിടന്നയാളുടെ അടുത്തേക്ക് ഓടിയെത്തുന്നതും കാണാം.

റെയിൽവേ മന്ത്രാലയത്തിന്റെ ട്വിറ്റർ പേജിലാണ് വിഡിയോ പങ്കുവച്ചിരിക്കുന്നത്. ഡ്രൈവറുടെ പ്രവൃത്തി അഭിനന്ദനം അർഹിക്കുന്നതാണെന്നും തക്കസമയത്തുള്ള ഇടപെടൽ മൂലം അദ്ദേഹം ഒരു ജീവൻ രക്ഷിച്ചെന്നുമാണ് വിഡിയോയ്‌ക്കൊപ്പം കുറിച്ചിരിക്കുന്നത്. നിങ്ങളുടെ ജീവൻ വിലപ്പെട്ടതാണ്, വീട്ടില് നിങ്ങൾക്കായി ചിലർ കാത്തിരിക്കുന്നുണ്ട്, ട്വീറ്റിൽ ഓർമ്മിപ്പിച്ചു.