മുഖ്യമന്ത്രി ഏതുനിമിഷവും വധിക്കപ്പെട്ടേക്കാം; പട്നായിക്കിന് ഭീഷണി 

ഭുവനേശ്വർ: ഒഡീഷ മുഖ്യമന്ത്രി നവീൻ പട്നായിക്കിന് വധഭീഷണി. മുഖ്യമന്ത്രി ഏതുനിമിഷവും വധിക്കപ്പെട്ടേക്കാമെന്നാണ് അജ്ഞാത കത്ത്.  ഭുവനേശ്വറിലെ മുഖ്യമന്ത്രിയുടെ ഔദ്യോഗിക വസതിയായ നവീൻ നിവാസിലേക്കാണ്​​ ഭീഷണിക്കത്ത്​ എത്തിയത്.  

എകെ 47 ഉൾപ്പെടെയുള്ള ആയുധങ്ങളുമായി​ മുഖ്യമന്ത്രിയെ വധിക്കാൻ തയാറായി നിൽക്കുന്നവരുണ്ടെന്നാണ് കത്തിലെ ഉള്ളടക്കം. 'കൊടുംക്രിമിനലുകളായ വാടകക്കൊലയാളികൾ ഏതു നിമിഷവും നിങ്ങളെ ആക്രമിക്കാൻ തയാറായി നിൽക്കുന്നു. ഇവർ നിങ്ങളെ നിരന്തരം പിന്തുടരുന്നുണ്ടെന്ന്​ മനസിലാക്കുക. സൂത്രധാരൻ താമസിക്കുന്നത്​ നാഗ്​പൂരിലാണ്. നിങ്ങളെ കൊല്ലാൻ ഉപയോഗിക്കുന്ന ആയുധങ്ങൾ വാങ്ങിയത്​ ഒഡീഷയിൽനിന്നാണ്​', കത്തിൽ പറയുന്നു. ഇം​ഗ്ലീഷിലാണ് കത്ത് എഴുതിയിരിക്കുന്നത്. 

ഭീഷണി സന്ദേശം ലഭിച്ചതിനെ തുടർന്ന്​ നവീൻ പട്​നായിക്കിന് സുരക്ഷ വർധിപ്പിച്ചിട്ടുണ്ട്.​ 'ഇസഡ്​ പ്ലസ്​' സുരക്ഷയാണ് അദ്ദേഹത്തിന് ഒരുക്കിയിരിക്കുന്നത്.