ന്യൂഡല്ഹി: മൂന്ന് അത്യാധുനിക തദ്ദേശീയമായി നിര്മ്മിച്ച യുദ്ധക്കപ്പലുകള് പ്രധാനമന്ത്രി നരേന്ദ്ര മോദി നാവികസേനയ്ക്ക് സമര്പ്പിച്ചു. ഇന്ത്യന് നാവികസേനയുടെ കരുത്ത് വര്ദ്ധിപ്പിക്കുന്നതിനായി നിര്മ്മിച്ച ഐഎന്എസ് അഗ്രേ (INS Agray), ഐഎന്എസ് സംശോധക് (INS Sanshokhak), ഐഎന്എസ് ദുനഗിരി (INS Dunagiri) എന്നിവയാണ് നരേന്ദ്ര മോദി ഞായറാഴ്ച കമ്മീഷന് ചെയ്തത്. ഔദ്യോഗികമായി നാവികസേനയുടെ ഭാഗമാകുന്നതോടെ, ഈ മൂന്ന് കപ്പലുകളും ഇന്ത്യയുടെ സമുദ്ര സുരക്ഷാ ശേഷി ഗണ്യമായി ഉയര്ത്തും. കൊല്ക്കത്തയിലെ ഗാര്ഡന് റീച്ച് ഷിപ്പ് ബില്ഡേഴ്സ് ആന്ഡ് എന്ജിനീയേഴ്സ് ആണ് ഈ മൂന്ന് പ്ലാറ്റ്ഫോമുകളും നിര്മ്മിച്ചത്.
കപ്പലുകളുടെ പ്രധാന സവിശേഷതകള്:
1. ഐഎന്എസ് സംശോധക് : അത്യാധുനിക ഹൈഡ്രോഗ്രാഫിക് സര്വേ വെസല് ആണിത്. സമുദ്രത്തിന്റെ അടിത്തട്ട് മാപ്പ് ചെയ്യുന്നതിനും വിശദമായ ഹൈഡ്രോഗ്രാഫിക് വിലയിരുത്തലുകള് നടത്തുന്നതിനും സുരക്ഷിതമായ നാവിഗേഷന് പാതകള് കണ്ടെത്തുന്നതിനുമായാണ് ഇത് രൂപകല്പ്പന ചെയ്തത്. സമുദ്രസംബന്ധമായ നിര്ണായക വിവരങ്ങള് നല്കി ഇത് നാവിക പ്രവര്ത്തനങ്ങളെ പിന്തുണയ്ക്കും. കൂടാതെ, മാനുഷിക സഹായം എത്തിക്കുന്നതിനും ദുരന്ത നിവാരണ പ്രവര്ത്തനങ്ങള്ക്കുമുള്ള ദൗത്യങ്ങളില് ഒരു താല്ക്കാലിക മെഡിക്കല് സപ്പോര്ട്ട് പ്ലാറ്റ്ഫോമായി പ്രവര്ത്തിക്കാനും ഈ കപ്പലിന് കഴിയും.
2. ഐഎന്എസ് അഗ്രേ: തീരദേശ ആന്റി അന്തര്വാഹിനി യുദ്ധക്കപ്പല് ആണ് ഐഎന്എസ് അഗ്രേ. തീരദേശങ്ങളിലും ആഴം കുറഞ്ഞ സമുദ്രമേഖലകളിലും സഞ്ചരിക്കുന്ന ശത്രുക്കളുടെ അന്തര്വാഹിനികളെ കണ്ടെത്താനും തകര്ക്കാനും രൂപകല്പ്പന ചെയ്ത കപ്പലാണിത്. അത്യാധുനിക സോണാര് സംവിധാനങ്ങള്, ആന്റി-സബ്മറൈന് റോക്കറ്റുകള്, ടോര്പ്പിഡോകള്, 30 എംഎം നാവിക തോക്ക് എന്നിവ സജ്ജീകരിച്ചിട്ടുള്ള ഈ കപ്പല് അതീവ കൃത്യതയോടെയുള്ള തീരദേശ പ്രതിരോധത്തിനായി നിര്മ്മിച്ചതാണ്. ഇതിന് മൈനുകള് വിന്യസിക്കാനുള്ള ശേഷിയുമുണ്ട്.
3. ഐഎന്എസ് ദുനഗിരി : മള്ട്ടി-റോള് സ്റ്റെല്ത്ത് ഫ്രിഗേറ്റ് ആണ് ദുനഗിരി. പ്രോജക്റ്റ് 17എയ്ക്ക് കീഴില് നിര്മ്മിച്ച ഈ കപ്പല്, മുന്നിര നീലഗിരി-ക്ലാസ് സ്റ്റെല്ത്ത് ഗൈഡഡ് മിസൈല് ഫ്രിഗേറ്റുകളുടെ ഭാഗമാണ്. ബ്രഹ്മോസ് സൂപ്പര്സോണിക് ക്രൂയിസ് മിസൈല് സംവിധാനം, ബരാക്-8 മീഡിയം റേഞ്ച് സര്ഫസ്-ടു-എയര് മിസൈല് സംവിധാനം, ടോര്പ്പിഡോകള് എന്നിവ ഈ കപ്പലില് സജ്ജീകരിച്ചിരിക്കുന്നു. വ്യോമ പ്രതിരോധം, ഉപരിതല യുദ്ധങ്ങള്, അന്തര്വാഹിനി വിരുദ്ധ ദൗത്യങ്ങള് എന്നിവ ഒരേപോലെ നിര്വ്വഹിക്കാന് ശേഷിയുള്ള ഈ കപ്പല് നാവികസേനയ്ക്ക് വലിയൊരു കരുത്താണ്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
