ന്യൂഡല്‍ഹി: പ്രധാനമന്ത്രി നരേന്ദ്രമോദി ലോകത്തിലെ ഏറ്റവും വിശ്വസനീയനായ നേതാവെന്ന് സര്‍വേ. 75 ശതമാനം അപ്രൂവല്‍ റേറ്റിങ്ങോടെ ലോകത്തിലെ ഏറ്റവും വിശ്വസനീയനായ നേതാവ് എന്ന സ്ഥാനത്ത് മോദി തുടരുകയാണെന്ന് മോര്‍ണിങ് കണ്‍സള്‍ട്ടിന്റെ പുതിയ ഗ്ലോബല്‍ ലീഡര്‍ അപ്രൂവല്‍ റേറ്റിങ്ങില്‍ പറയുന്നു.
ജൂലൈ 4 നും 10 നും ഇടയില്‍ നടത്തിയ റേറ്റിങ്ങിലാണ് ലോകത്തിലെ ഏറ്റവും വിശ്വസനീയനായ നേതാവായി മോദിയെ തെരഞ്ഞെടുത്തത്. ദക്ഷിണ കൊറിയയുടെ ലീ ജെയ്-മ്യുങ് (59 ശതമാനം), അര്‍ജന്റീനയുടെ ജാവിയര്‍ മിലി (57 ശതമാനം), കാനഡയുടെ മാര്‍ക്ക് കാര്‍ണി (56 ശതമാനം) തുടങ്ങിയ നേതാക്കളെ മറികടന്നാണ് മോദി ആഗോള പട്ടികയില്‍ മുന്നിലെത്തിയത്. യുഎസ് പ്രസിഡന്റ് ഡോണള്‍ഡ് ട്രംപ് 44 ശതമാനവുമായി എട്ടാം സ്ഥാനത്താണ്. അന്താരാഷ്ട്ര വേദികളിലെ മോദിയുടെ ജനപ്രീതിയാണ് റേറ്റിങ്ങില്‍ പ്രതിഫലിക്കുന്നതെന്ന് റിപ്പോര്‍ട്ട് വ്യക്തമാക്കുന്നു
മോര്‍ണിങ് കണ്‍സള്‍ട്ടിന്റെ ഗ്ലോബല്‍ ലീഡര്‍ അപ്രൂവല്‍ റേറ്റിംഗ് ട്രാക്കറില്‍ പ്രധാനമന്ത്രി നരേന്ദ്ര മോദി 2021 മുതല്‍ ഒന്നാം സ്ഥാനത്ത് തുടരുകയാണ്. അന്ന് അദ്ദേഹത്തിന് 70 ശതമാനം അപ്രൂവല്‍ റേറ്റിങ് ആണ് ഉണ്ടായിരുന്നത്. 2022 ന്റെ തുടക്കത്തില്‍, അദ്ദേഹത്തിന്റെ റേറ്റിങ് ഏകദേശം 71 ശതമാനമായി ഉയര്‍ന്നു. 13 ലോക നേതാക്കളുടെ സര്‍വേയിലാണ് അദ്ദേഹം ഒന്നാമതെത്തിയത്. ഏപ്രില്‍, സെപ്റ്റംബര്‍, ഡിസംബര്‍ മാസങ്ങളില്‍ നടത്തിയ സര്‍വേകളില്‍ റേറ്റിങ് 76 ശതമാനത്തിലെത്തി. 2023 ല്‍ ഉടനീളം അദ്ദേഹം ലീഡ് തുടര്‍ന്നു. 2024 ഫെബ്രുവരിയില്‍, അദ്ദേഹത്തിന്റെ അംഗീകാരം 78 ശതമാനത്തിലെത്തി.
'നൂറ് കോടി ഇന്ത്യക്കാരുടെ സ്‌നേഹവും ലോകമെമ്പാടുമുള്ള ദശലക്ഷക്കണക്കിന് ആളുകളുടെ ബഹുമാനവും നേടിയ പ്രധാനമന്ത്രി നരേന്ദ്ര മോദി, ഏറ്റവും വിശ്വസനീയമായ നേതാവിനെ കണ്ടെത്തുന്നതിനുള്ള മോര്‍ണിങ് കണ്‍സള്‍ട്ട് ഗ്ലോബല്‍ ലീഡര്‍ അപ്രൂവല്‍ ട്രാക്കറില്‍ വീണ്ടും ഒന്നാം സ്ഥാനത്ത് എത്തി. ശക്തമായ നേതൃത്വം. ആഗോള ബഹുമാനം. ഭാരതം സുരക്ഷിതമായ കൈകളിലാണ്,'- ബിജെപി നേതാവ് അമിത് മാളവ്യ എക്സില്‍ കുറിച്ചു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
