ന്യൂഡല്ഹി: മോദി പരാമര്ശത്തിന്റെ പേരിലുള്ള അപകീര്ത്തിക്കേസില് രാഹുല് ഗാന്ധിയുടെ ശിക്ഷാവിധി സ്റ്റേ ചെയ്ത സുപ്രീം കോടതി ഉത്തരവില്
സന്തോഷ പ്രകടനങ്ങളുമായി കോണ്ഗ്രസ് നേതാക്കളും പ്രവര്ത്തകരും.
'സൂര്യനെയും ചന്ദ്രനെയും സത്യത്തെയും നിങ്ങള്ക്ക് അധികകാലം മറയ്ക്കാനാകില്ല' എന്ന ബുദ്ധ വചനം പ്രിയങ്ക ഗാന്ധി ട്വിറ്ററില് കുറിച്ചു. സുപ്രീം കോടതിയോട് പ്രിയങ്ക നന്ദി രേഖപ്പെടുത്തി.
സുപ്രീം കോടതി വിധി സ്റ്റേ ചെയ്ത സാഹചര്യത്തില് രാഹുല് ഗാന്ധിയെ ലോക്സഭയില് ഹാജരാകാന് അനുവദിക്കണമെന്ന് ലോക്സഭയിലെ കോണ്ഗ്രസ് നേതാവായ അധീര് രഞ്ജന് ചൗധരി സ്പീക്കറോട് ആവശ്യപ്പെട്ടു. ഇക്കാര്യത്തില് കേന്ദ്രസര്ക്കാര് തടസ്സങ്ങള് സൃഷ്ടിക്കുമെന്നതിനാല് എത്രയും വേഗം അയോഗ്യത പിന്വലിക്കണമെന്നും അദ്ദേഹം സ്പീക്കറോട് ആവശ്യപ്പെട്ടു.
സംഘ് പരിവാറിന്റെ രാഷ്ട്രീയ ഗൂഡാലോചനക്കും മോദി സര്ക്കാരിന്റെ പകപോക്കലിനുമെതിരായ തിരിച്ചടിയാണിതെന്ന് വിടി ബല്റാം ഫെയ്സ ബുക്കില് കുറിച്ചു. ഏതൊരു സാധാരണ മനുഷ്യനും പ്രാഥമികമായിത്തന്നെ ബോധ്യപ്പെടുന്ന ഈ കേസിലെ കൊടിയ അനീതി അവസാനം രാജ്യത്തെ പരമോന്നത നീതിപീഠത്തിനെങ്കിലും തിരിച്ചറിയാന് കഴിഞ്ഞു എന്നതില് സന്തോഷം. എന്നാല് അതോടൊപ്പം നമ്മുടെ താഴെത്തട്ടിലുള്ള നീതിന്യായ സംവിധാനങ്ങള് എത്രത്തോളം സംഘ് പരിവാര് താത്പര്യങ്ങള്ക്ക് മുമ്പില് കീഴടങ്ങിക്കഴിഞ്ഞിരിക്കുന്നു എന്നതാണ് ഈ കേസിലെ മജിസ്ട്രേറ്റ് കോടതിയിലേയും ജില്ലാ കോടതിയിലേയും ഗുജറാത്ത് ഹൈക്കോടതിയിലേയും അപഹാസ്യമായ വിധിപ്രഖ്യാപനങ്ങള് തെളിയിക്കുന്നത്.
അതിനാല്ത്തന്നെ സുപ്രീം കോടതിയുടെ ഈ വിധി 'രാഹുല്ഗാന്ധിക്ക് ആശ്വാസം', 'കോണ്ഗ്രസിന് ആശ്വാസം' എന്ന തലക്കെട്ടൊന്നും വച്ചല്ല വാര്ത്തയായി നല്കേണ്ടത്, ഇത് ഇന്ത്യയുടെ ജനാധിപത്യത്തില് വിശ്വസിക്കുന്ന, നീതി ന്യായ സംവിധാനങ്ങളുടെ നിഷ്പക്ഷതയില് വിശ്വസിക്കുന്ന സാധാരണ പൗരന്മാര്ക്ക് അല്പ്പമെങ്കിലും ആശ്വാസം പകരുന്ന ഒരു വിധിയായാണ് നോക്കിക്കാണേണ്ടത്. മോദിയുടെ ഈ തോന്ന്യാസത്തിനെതിരായ അന്തിമ വിധിയെഴുത്ത് വരാനിരിക്കുന്നതേയുള്ളൂ, 2024ല്. ജനങ്ങളുടെ കോടതിയില്. അവിടെ I.N.D.I.A ജയിക്കും, ഇന്ത്യ ജയിക്കുമെന്ന് ബല്റാം സാമൂഹിക മാധ്യമത്തില് കുറിച്ചു,
എല്ലാ കള്ളന്മാര്ക്കും മോദി എന്ന പേരു വന്നതെങ്ങനെ എന്ന പരാമര്ശത്തിന്റെ പേരിലാണ്, രാഹുല് കുറ്റക്കാരനാണെന്നു സൂറത്ത് കോടതി വിധിച്ചത്.
രാഹുലിന്റെ പരാമര്ശങ്ങള് ഔചിത്യമുള്ളതെന്നു കരുതാനാവില്ലെന്ന്, ജസ്റ്റിസ് ബിആര് ഗവായിയുടെ നേതൃത്വത്തിലുള്ള ബെഞ്ച് അഭിപ്രായപ്പെട്ടു. പൊതുരംഗത്തുള്ളവര് പ്രസംഗിക്കുമ്പോള് കൂടുതല് ജാഗ്രത പുലര്ത്തണമെന്നും കോടതി പറഞ്ഞു. എന്നാല് രാഹുലിനു പരമാവധി ശിക്ഷ നല്കിയ വിചാരണക്കോടതി നടപടിക്കു കാരണമൊന്നും കാണുന്നില്ല. അതുകൊണ്ടു കുറ്റക്കാരനെന്നു കണ്ടെത്തിയതു സ്റ്റേ ചെയ്യുകയാണെന്നും അന്തിമ വിധിക്കു വിധേയമായിരിക്കും ഇതെന്നും സുപ്രീം കോടതി വിധിച്ചു.
ഈ വാര്ത്ത കൂടി വായിക്കൂ
സമകാലിക മലയാളം ഇപ്പോള് വാട്സ്ആപ്പിലും ലഭ്യമാണ്. ഏറ്റവും പുതിയ വാര്ത്തകള്ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
