'മോദി ജി, പറയൂ പെട്രോളില്‍ എത്രത്തോളം എഥനോള്‍ അടങ്ങിയിട്ടുണ്ടെന്ന്?; ആഗ്രഹിച്ച് വാങ്ങിയ വണ്ടി നശിക്കുകയാണ്'

ന്യൂഡല്‍ഹി: കര്‍ണാടകയില്‍ വില്‍ക്കുന്ന പെട്രോളില്‍ അനുവദീനയമായതിലും കൂടുതല്‍ എഥനോള്‍ കലര്‍ത്തിയെന്ന ആരോപണത്തില്‍ കേന്ദ്ര സര്‍ക്കാരിനെതിരെ വിമര്‍ശനവുമായി പ്രതിപക്ഷ നേതാവ് രാഹുല്‍ ഗാന്ധി. പരിധിക്ക് മുകളില്‍ എഥനോള്‍ കലര്‍ത്തിയ എണ്ണക്കമ്പനികള്‍ക്കെതിരെ എപ്പോഴാണ് നടപടിയെടുക്കുകയെന്ന് അദ്ദേഹം ചോദിച്ചു

കര്‍ണാടകയിലെ 7 ജില്ലകളില്‍ നിന്ന് ശേഖരിച്ച പെട്രോള്‍ സാമ്പിളുകള്‍ പരിശോധന നടത്തിയപ്പോള്‍ 20 ശതമാനത്തിലധികം എഥനോള്‍ കലര്‍ത്തിയെന്ന് കണ്ടെത്തിയെന്നും രാഹുല്‍ ഗാന്ധി ആരോപിച്ചു. ജനങ്ങളുടെ വണ്ടിയില്‍ നിന്ന് പെട്രോള്‍ മോഷ്ടിക്കുന്ന നടപടിയാണ് വെളിച്ചത്തുവന്നതെന്നും ഈ തട്ടിപ്പില്‍ ആര്‍ക്കാണ് നേട്ടമെന്നും രാഹുല്‍ ചോദിച്ചു. ജനങ്ങള്‍ വലിയ വില കൊടുത്ത് പെട്രോള്‍ വാങ്ങുമ്പോള്‍ ടാങ്കില്‍ നിറയുന്നത് എഥനോള്‍ ആണെന്ന് രാഹുല്‍ പറഞ്ഞു. ഇത്രയധികം എഥനോള്‍ താങ്ങാനുള്ള ശേഷി ജനങ്ങളുടെ വാഹനത്തിനില്ല. മൈലേജ് കുറയുന്നു. അടിക്കടി വാഹനം വര്‍ക്ക്‌ഷോപ്പില്‍ കൊണ്ടുപോകേണ്ടി വരുന്നു. ആഗ്രഹിച്ച് വാങ്ങിയ വണ്ടി നശിക്കുകയാണ്. വാഹന ടാങ്കില്‍ എന്താണ് നിറയ്ക്കുന്നതെന്ന് പമ്പില്‍ എഴുതിവച്ചിട്ടില്ല. ഏത് തിരഞ്ഞെടുക്കണമെന്ന സ്വാതന്ത്ര്യവും ജനങ്ങള്‍ക്കില്ല. 'മോദി ജീ പറയൂ, ടാങ്കില്‍ എന്താണ് നിറയ്ക്കുന്നത്? പെട്രോളില്‍ യഥാര്‍ത്ഥത്തില്‍ എത്രത്തോളം എഥനോള്‍ അടങ്ങിയിട്ടുണ്ട്? 20 ശതമാനത്തില്‍ കൂടുതല്‍ എഥനോള്‍ കലര്‍ത്തുന്ന കമ്പനികള്‍ക്കെതിരെ എപ്പോഴാണ് നടപടിയെടുക്കുക?', രാഹുല്‍ ഗാന്ധി ചോദിച്ചു.

ഐഒസിഎല്ലില്‍ 31.2 ശതമാനവും എച്ച്പിസിഎല്ലില്‍ 30.5 ശതമാനവും എഥനോള്‍ സാന്നിധ്യം കണ്ടെത്തി. ഐഒസിഎല്‍, എച്ച്പിസിഎല്‍, ബിപിസിഎല്‍, നയാര തുടങ്ങിയ പൊതുമേഖലാ-സ്വകാര്യ എണ്ണക്കമ്പനികളെല്ലാം അനുവദനീയമായ പരിധിക്കപ്പുറമാണ് ഇന്ധനത്തില്‍ എഥനോള്‍ കലര്‍ത്തുന്നത്. കമ്പനികളുടെ സ്വന്തം ലാബുകള്‍ നല്‍കുന്ന റിപ്പോര്‍ട്ടുകളില്‍ എഥനോളിന്റെ അളവ് പോലും ചേര്‍ത്തിട്ടില്ലെന്നും രാഹുല്‍ പറഞ്ഞു.

നേരത്തെ പ്രധാനമന്ത്രിക്ക് മുന്നില്‍വെച്ച സംവാദത്തിനായുള്ള വെല്ലുവിളി ഇപ്പോഴും നിലനില്‍ക്കുകയാണെന്നും സര്‍ക്കാരിന്റെ നയങ്ങള്‍കൊണ്ട് യഥാര്‍ത്ഥത്തില്‍ പ്രയോജനം ലഭിക്കുന്നത് ആര്‍ക്കാണെന്ന ചോദ്യംകൂടി ഈ സംവാദത്തിലേക്ക് കൂട്ടിച്ചേര്‍ക്കുന്നുവെന്നും അദ്ദേഹം കുറിപ്പില്‍ പറയുന്നു.