ന്യൂഡല്‍ഹി: ആലിയ ഭട്ട് അഭിനയിച്ച സഞ്ജയ് ലീലാ ബന്‍സാലി ചിത്രമായ ഗംഗുഭായി കത്തിയവാഡിയുടെ റിലീസ് തടയണമെന്ന് ആവശ്യപ്പെട്ടു നല്‍കിയ ഹര്‍ജി സുപ്രീം കോടതി തള്ളി. ഗംഗുഭായിയുടെ ദത്തുപുത്രന്‍ എന്ന് അവകാശപ്പെട്ട ബാബുജി റാവ് ജി ഷാ എന്നയാളാണ് ഹര്‍ജി നല്‍കിയത്.
ചിത്രത്തിന്റെ റിലീസ് തടയണമെന്ന് ആവശ്യപ്പെട്ട് ബാബുജി ബോംബെ ഹൈക്കോടതിയെ സമീപിച്ചിരുന്നു. ഇതു തള്ളിയ ഉത്തരവിന് എതിരെയാണ് സുപ്രീം കോടതിയില്‍ എത്തിയത്.
താന്‍ ഗംഗുഭായിയുടെ മകനാണെന്ന് ഷാ പറയുന്നത് അല്ലാതെ അതിനു തെളിവൊന്നും ഹാജരാക്കിയിട്ടില്ലെന്ന് നിര്‍മാതാക്കളുടെ അഭിഭാഷകന്‍ ചൂണ്ടിക്കാട്ടി. അവകാശവാദം തെളിയിക്കുന്നതിന് ഒരു റേഷന്‍ കാര്‍ഡ് ആണ് ഹാജരാക്കിയിട്ടുള്ളത്. ഇതെങ്ങനെ സ്വീകരിക്കാനാവുമെന്ന് നിര്‍മാതാക്കള്‍ ചോദിച്ചു.
2011ല്‍ പുറത്തിറങ്ങിയ പുസ്തകത്തിന്റെ അടിസ്ഥാനത്തിലാണ് ചിത്രം നിര്‍മിച്ചിട്ടുള്ളത്. ഇതുവരെ ഈ പുസ്തകത്തെ ആരും ചോദ്യം ചെയ്തിട്ടില്ല. നാല്‍പ്പതു വര്‍ഷം മുമ്പ് മരിച്ചുപോയ ഗംഗു ഭായി, ചുവന്ന തെരുവിലാണ് ജീവിച്ചതെങ്കിലും അവരുടെ നേട്ടങ്ങളാണ് ചിത്രത്തില്‍ പറയാന്‍ ശ്രമിക്കുന്നത്. ഇതില്‍ അപകീര്‍ത്തിയുടെ പ്രശ്‌നമില്ലെന്ന് നിര്‍മാതാക്കള്‍ വാദിച്ചു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
