കോവോവാക്സ് കുട്ടികളിലെ പരീക്ഷണം ജൂലൈയിൽ തുട‌ങ്ങും: അദാർ പൂനാവാല 

ന്യൂഡൽഹി: സിറം ഇൻസ്റ്റിറ്റ്യൂട്ടിന്റെ കോവോവാക്സ് കോവിഡ് വാക്‌സിന്റെ കുട്ടികളിലെ ക്ലിനിക്കൽ പരീക്ഷണങ്ങൾ അടുത്ത മാസം ആരംഭിക്കും. ഡിസിജിഐയുടെ അനുമതി ലഭിച്ചാൽ 10 കേന്ദ്രങ്ങളിൽ കുട്ടികളിലെ പരീക്ഷണം ആരംഭിക്കുമെന്ന് സിറം ഇൻസ്റ്റിറ്റ്യൂട്ട് ഓഫ് ഇന്ത്യ സിഇഒ അദാർ പൂനാവാല പറഞ്ഞു. വാക്സിന്റെ രണ്ടും മൂന്നും ഘട്ട ക്ലിനിക്കൽ പരീക്ഷണങ്ങളാണ് ജൂലൈയിൽ തുടങ്ങുക. 

‌രണ്ട് മുതൽ 17 വരെ പ്രായപരിധിയുള്ള 920 കുട്ടികളിലാണ് പരീക്ഷണം. സിറം ഇൻസ്റ്റിറ്റ്യൂട്ട് നിർമിക്കുന്ന രണ്ടാമത്തെ കോവിഡ് വാക്‌സിനാണ് കോവോവാക്‌സ്. അമേരിക്കൻ കമ്പനിയായ നോവോവാക്‌സ് വികസിപ്പിച്ച വാക്‌സിനാണ് കോവോവാക്‌സ് എന്ന പേരിലാണ് ഇന്ത്യയിൽ ഇറക്കുക. 

കോവോവാക്‌സിന്റെ ആദ്യത്തെ ബാച്ച് നിർമാണം ഈ ആഴ്ച ആരംഭിച്ചെന്നും 18 വയസിന് താഴെയുള്ള ഭാവിതലമുറയെ സംരക്ഷിക്കാൻ വാക്‌സിന് കഴിവുണ്ടെന്നും പൂനാവാല പറഞ്ഞു. ഈ വർഷം സെപ്തംബറോടെ കോവോവാക്സ് വാക്സിൻ പുറത്തിറക്കാൻ സാധിക്കുമെന്നാണ് പ്രതീക്ഷയെന്ന് അദ്ദേഹം കൂട്ടിച്ചേർത്തു.