വോട്ടർ പട്ടിക പരിഷ്കരണം: തെരഞ്ഞെടുപ്പ് കമ്മിഷന്റെ സത്യവാങ്മൂലത്തിന് മറുപടി നൽകാൻ ഹർജിക്കാർക്ക് 10 ദിവസത്തെ സമയം അനുവദിച്ച് സുപ്രീം കോടതി

ന്യൂഡൽഹി: വോട്ടർ പട്ടികയിലെ വിവാദമായ പ്രത്യേക തീവ്ര പരിഷ്കരണ പ്രക്രിയയെ ന്യായീകരിച്ചുകൊണ്ട് കേന്ദ്ര തെരഞ്ഞെടുപ്പ് കമ്മിഷൻ സമർപ്പിച്ച സത്യവാങ്മൂലത്തിന് മറുപടി നൽകാൻ ഹർജിക്കാർക്ക് പത്ത് ദിവസത്തെ സമയം അനുവദിച്ച് സുപ്രീം കോടതി. എസ്ഐആർ നടപടികൾ പൂർണ്ണമായും നിയമപരമായ ചട്ടക്കൂടുകൾക്കുള്ളിൽ നിന്നുകൊണ്ടുള്ളതാണെന്നും മൂന്ന് അംഗങ്ങളും ചേർന്നാണ് വിജ്ഞാപനങ്ങൾ ഏകകണ്ഠമായി പുറപ്പെടുവിച്ചതെന്നും വ്യക്തമാക്കി കമ്മിഷൻ സമർപ്പിച്ച 248 പേജുള്ള സത്യവാങ്മൂലത്തിനാണ് ഹർജിക്കാർ മറുപടി നൽകേണ്ടത്.

ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മാല്യ ബാഗ്ചി, ജസ്റ്റിസ് വി. മോഹന എന്നിവരടങ്ങിയ മൂന്നംഗ ബെഞ്ചാണ് കേസ് പരിഗണിച്ചത്. ബിഹാർ വോട്ടർ പട്ടിക പരിഷ്കരണത്തിനിടെ പരമോന്നത കോടതിയുടെ മുൻകൂർ അനുമതിയില്ലാതെ വോട്ടർ രജിസ്ട്രേഷൻ ഫോം 6-ൽ അനധികൃത മാറ്റങ്ങൾ വരുത്തിയെന്ന് ആരോപിച്ച് രാജ്യസഭാ എംപി ഡോല സെൻ നൽകിയ പുതിയ ഹർജിയിൽ ബെഞ്ച് തെരഞ്ഞെടുപ്പ് കമ്മിഷന് നോട്ടീസ് അയച്ചു.

ഡോല സെന്നിന് വേണ്ടി ഹാജരായ മുതിർന്ന അഭിഭാഷകയും എംപിയുമായ മേനക ഗുരുസ്വാമി, ഫോം 6-ൽ മാറ്റങ്ങൾ വരുത്താൻ സുപ്രീം കോടതി അനുമതി നൽകിയിരുന്നുവെന്ന തെരഞ്ഞെടുപ്പ് കമ്മിഷന്റെ വാദം തെറ്റാണെന്ന് ചൂണ്ടിക്കാട്ടി. തുടർന്ന്, വിഷയത്തിലെ എല്ലാ നിയമപ്രശ്നങ്ങളും കോടതി സമഗ്രമായി പരിശോധിക്കുമെന്ന് വ്യക്തമാക്കിയ ചീഫ് ജസ്റ്റിസ് സൂര്യകാന്ത്, ആദ്യ ഹർജിക്കാരനായ രാകേഷ് കുമാർ സിംഗിന്റെ അഭിഭാഷകൻ വികാസ് സിംഗിനോട് കമ്മിഷന്റെ സത്യവാങ്മൂലത്തിന് പത്ത് ദിവസത്തിനകം വിശദമായ മറുപടി സത്യവാങ്മൂലം സമർപ്പിക്കാൻ ഉത്തരവിട്ടു.

മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിനും കമ്മിഷന്റെ ഏകപക്ഷീയ തീരുമാനങ്ങൾക്കുമെതിരെ ഉയർന്ന പരാതികളിലാണ് ഡെപ്യൂട്ടി ഇലക്ഷൻ കമ്മിഷണർ ഭാനു പ്രകാശ് യെട്ടുരു വഴി തെരഞ്ഞെടുപ്പ് കമ്മിഷൻ 248 പേജുള്ള വിശദീകരണം കോടതിയിൽ ഫയൽ ചെയ്തത്. വോട്ടർ രജിസ്ട്രേഷനായി ഉപയോഗിക്കുന്ന സ്റ്റാറ്റ്യൂട്ടറി ഫോം 6-ൽ യാതൊരുവിധ അനധികൃത തിരുത്തലുകളും വരുത്തിയിട്ടില്ലെന്ന് കമ്മിഷൻ വ്യക്തമാക്കി. തെരഞ്ഞെടുപ്പ് കമ്മിഷനെതിരെ അടിസ്ഥാനരഹിതമായ ആരോപണങ്ങൾ ഉന്നയിക്കാനുള്ള ശ്രമങ്ങൾ നിർഭാഗ്യകരമാണെന്നും സത്യവാങ്മൂലത്തിൽ ചൂണ്ടിക്കാട്ടിയിട്ടുണ്ട്.

സുപ്രീം കോടതിയിൽ സമർപ്പിച്ചിരിക്കുന്ന ഈ സത്യവാങ്മൂലം പോലും മുഖ്യ തെരഞ്ഞെടുപ്പ് കമ്മീഷണറും മറ്റ് രണ്ട് കമ്മീഷണർമാരും ചേർന്നുള്ള കൂട്ടായ തീരുമാനപ്രകാരമാണ് അംഗീകരിച്ചതെന്ന് കമ്മീഷൻ അവകാശപ്പെട്ടു. എന്നാൽ, കഴിഞ്ഞ പത്ത് മാസത്തിനിടയിൽ തങ്ങളുടെ അറിവോ ശുപാർശയോ ഇല്ലാതെ പുറപ്പെടുവിച്ച എസ്ഐആർ ഉത്തരവുകളിൽ തിരഞ്ഞെടുപ്പ് കമ്മിഷണർമാരായ സുഖ്ബീർ സിംഗ് സന്ധുവും വിവേക് ജോഷിയും ചുരുങ്ങിയത് 14 തവണ രേഖാമൂലം വിയോജിപ്പ് രേഖപ്പെടുത്തിയിരുന്നുവെന്ന് സെപ്റ്റംബർ 25-ന് വന്ന മാധ്യമ റിപ്പോർട്ടാണ് വലിയ രാഷ്ട്രീയ കൊടുങ്കാറ്റിന് തിരികൊളുത്തിയത്.

ഇതിനെത്തുടർന്ന് പ്രതിപക്ഷ പാർട്ടികളും വിവിധ രാഷ്ട്രീയ കൂട്ടായ്മകളും മുഖ്യ തെരഞ്ഞെടുപ്പ് കമ്മിഷണർ ഗ്യാനേഷ് കുമാറിനെ തലപ്പത്തുനിന്ന് മാറ്റണമെന്ന് ആവശ്യപ്പെട്ട് പ്രക്ഷോഭം ശക്തമാക്കിയിരുന്നു. ഹർജിക്കാരുടെ മറുപടി സത്യവാങ്മൂലം കൂടി ലഭിച്ച ശേഷം കേസിൽ സുപ്രീം കോടതി തുടർവാദം കേൾക്കും.