ചാണകത്തിന്റെയും ഗോമൂത്രത്തിന്റെയും ഉത്പന്നങ്ങള്‍ ഉപയോഗിക്കുന്നത് ശീലമാക്കണം; കര്‍ണാടക മന്ത്രി

ബംഗളൂരു: പശു സംരക്ഷണത്തിന്റെ ഭാ​ഗമായി ​ഗോമൂത്രവും ചാണകവും ഉപയോ​ഗിച്ച നിർമ്മിച്ച ഉത്പന്നങ്ങൾ ഉപയോ​ഗിക്കാൻ ശീലിക്കണമെന്ന് 
​കർണാടക മൃഗസംരക്ഷണ-ഹജ്ജ്​ വഖഫ്​ മന്ത്രി പ്രഭു ചൗഹാൻ. സംസ്ഥാനത്ത്​ ഗോവധ നിരോധന-കന്നുകാലി സംരക്ഷണ നിയമം ഓർഡിനൻസിലൂടെ പ്രാബല്യത്തിൽ വന്നതിന്​ പിന്നാലെയാണ്​ വകുപ്പ്​ മന്ത്രിയുടെ പ്രതികരണം

ഗോമൂത്രം, ചാണകത്തിരികൾ, നെയ്യ്​, പഞ്ചഗവ്യ മരുന്നുകൾ, ചാണകസോപ്പ്​, ഷാമ്പൂ, ത്വഗ്​​ലേപനം തുടങ്ങി വിവിധ ഉൽപന്നങ്ങൾ വിപണിയിൽ ലഭ്യമാണെന്നും ഇവ ജനങ്ങൾ ഉപയോഗിക്കണമെന്നും അദ്ദേഹം പറഞ്ഞു. ഗോമൂത്രം, ചാണകം, പാൽ, തൈര്​, നെയ്യ്​ എന്നിവ ചേർത്ത പഞ്ചഗവ്യം സ്ഥിരമായി ഉപയോഗിക്കുന്നത്​ ശരീരത്തിലെ വിഷാംശം കളയുമെന്നും അദ്ദേഹം അവകാശപ്പെട്ടു. ജനങ്ങൾക്കിടയിൽ ബോധവത്​കരണത്തിനായി ഇത്തരം ഉപോൽപന്നങ്ങൾ സംബന്ധിച്ച്​ കാര്യമായ ഗവേഷണത്തിന്​ സർക്കാർ മുൻകൈയെടുക്കുമെന്നും മന്ത്രി പറഞ്ഞു. ഉപേക്ഷിക്കപ്പെടുന്ന പശുക്കളുടെ മേൽനോട്ടം വഹിക്കാൻ തയാറുള്ളവർ സർക്കാറിന്​ സഹായകരമായി മുന്നോട്ടുവരണമെന്നും അദ്ദേഹം അഭ്യർഥിച്ചു.

സംസ്ഥാനത്ത് പശു, പശുക്കിടാവ്, കാള, 13 വയസ്സിൽ താഴെയുള്ള പോത്ത് എന്നിവയെ അറുക്കുന്നതിനും വിൽക്കുന്നതിനുമാണ് നിരോധനം ഏർപ്പെടുത്തിയത്. 13 വയസ്സിന് മുകളിലുള്ള പോത്തുകളെ വെറ്ററിനറി ഓഫിസറുടെയോ അധികാരികളുടെയോ അനുമതിയോടെ അറുക്കാൻ അനുമതിയുണ്ട്​. നിയമം ലംഘിക്കുന്നവർക്ക്​ മൂന്നു മുതൽ ഏഴു വർഷം വരെ തടവും അരലക്ഷം മുതൽ 10 ലക്ഷം രൂപ വരെ പിഴയുമാണ്​ ശിക്ഷ.