പുതുമയുള്ള ചിത്രങ്ങള്‍ക്കായി വിവാഹഫോട്ടോഗ്രാഫര്‍മാര്‍ നടത്തുന്ന പരിശ്രമങ്ങള്‍ പലപ്പോഴും വാര്‍ത്തയായിട്ടുണ്ട്. മരത്തില്‍ തൂങ്ങിക്കിടന്നും കയറില്‍ തൂങ്ങിയാടിയുമെല്ലാം സാഹസികമായാണ് പല രംഗങ്ങളും കാമറയിലാക്കുന്നത്. എന്നാലിപ്പോള്‍ വധൂവരന്‍മാരുടെ എന്‍ട്രി ചിത്രീകരിക്കുന്നതിനിടെ കാമറാമാന് കിട്ടിയ പണിയാണ് വൈറലാകുന്നത്. വിഡിയോ പകര്‍ത്തി പിന്നോട്ട് നീങ്ങുന്നതിനിടെ പുറകിലുള്ള സ്വിമ്മിങ് പൂള്‍ ശ്രദ്ധിക്കാതെ കാമറാമാന് നേരെ വെള്ളത്തിലേക്ക്.
ആഢംഭര റിസോര്‍ട്ടില്‍ നടന്ന വിവാഹത്തില്‍ വരനും വധുവും എത്തുന്ന രംഗങ്ങള്‍ പകര്‍ത്തുന്നതിനിടെയാണ് സംഭവം. ഇരുവരും പരമ്പരാഗത വേഷത്തില്‍ അതിഥികളുടെ ഇടയിലേക്ക് നടന്നുവന്നു. ഇവരുടെ രംഗപ്രവേശനം മുന്നില്‍ നിന്ന് ക്യാമറയില്‍ പകര്‍ത്തുകയായിരുന്ന ഫോട്ടോഗ്രാഫര്‍. ഒടുവില്‍ കാല്‍വഴുതി പൂളിലേക്ക് മറിയുകയായിരുന്നു. വെള്ളത്തില്‍ വീണെങ്കിലും കാമറ കൈയില്‍ നിന്ന് വീഴാതെ ഉയര്‍ത്തിപ്പിടിച്ചിട്ടുണ്ട്.
സംഭവത്തില്‍ ഫോട്ടോഗ്രാഫര്‍ക്ക് പരിക്കൊന്നും സംഭവിച്ചില്ലെന്ന ആശ്വാസമാണ് വിഡിയോയ്ക്ക് ലഭിക്കുന്ന കമന്റുകളില്‍ നിറയുന്നത്. വെള്ളത്തില്‍ വീണിട്ടും കാമറ സൂക്ഷിക്കാന്‍ നടത്തിയ ശ്രമം എടുത്തുപറയുന്നവരും ഇക്കൂട്ടത്തിലുണ്ട്, എങ്കിലും കാമറയ്‌ക്കോ ലെന്‍സിനോ കേടുപാടുണ്ടോ എന്ന് തിരക്കുകയാണ് പലരും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
