തീവണ്ടി യാത്രയിൽ ഇനി സ്ത്രീകൾക്ക് പേടിവേണ്ട, കൂട്ടായി 'മേരീ സഹേലി'; സുരക്ഷ ഉറപ്പാക്കാൻ പുതിയ സംരംഭം 

ചെന്നൈ: തീവണ്ടികളിൽ സ്ത്രീസുരക്ഷ ഉറപ്പാക്കാനായി റെയിൽവേയുടെ പുതിയ സംരംഭം. മേരീ സഹേലി (എന്റെ കൂട്ടുകാരി) എന്ന് പേരിട്ടിരിക്കുന്ന സംരംഭത്തിലൂടെ ആർപിഎഫിന്റെ പെൺസംഘങ്ങൾ യാത്രയുടെ തുടക്കംമുതൽ ഒടുക്കംവരെ ഇനി ഒപ്പമുണ്ടാകും. യാത്ര തുടങ്ങുന്ന സ്റ്റേഷനിൽനിന്നുതന്നെ റെയിൽവേ പൊലീസിലെ യുവ വനിതാ ഉദ്യോഗസ്ഥരുടെ നേതൃത്വത്തിലുള്ള സംഘം തീവണ്ടികളിൽ കയറും. അവസാന സ്റ്റേഷൻ വരെ ഇവർ ഒപ്പമുണ്ടാകും. 

വനിതായാത്രക്കാരോട് സംസാരിച്ച് സുരക്ഷാ ബോധവത്കരണം നടത്തുകയാണ് മേരീ സഹേലിയുടെ ആദ്യപടി. ഒറ്റയ്ക്ക് യാത്രചെയ്യുന്ന സ്ത്രീകളുമായി നിർബന്ധമായും സംസാരിക്കണമെന്നാണ് ഉദ്യോ​ഗസ്ഥർക്ക് നൽകിയിരിക്കുന്ന നിർദേശം.സഹായം ആവശ്യപ്പെട്ടുള്ള ഫോൺ വിളി വന്നാൽ, മുതിർന്ന ഉദ്യോഗസ്ഥരുടെ തലത്തിൽ നടപടി സ്വീകരിക്കും. 

ദക്ഷിണ റെയിൽവേ ‘മേരി സഹേലി’യുടെ 17 സംഘങ്ങൾ രൂപവത്കരിച്ചു. ആർപിഎഫ് സംഘം വനിതായാത്രക്കാരുടെ സീറ്റ് നമ്പരുകൾ ശേഖരിച്ച്, വഴിമധ്യേയുള്ള സ്റ്റോപ്പുകളിൽ ഡ്യൂട്ടിയിലുള്ള ഉദ്യോഗസ്ഥർക്ക് കൈമാറും. സ്റ്റേഷനുകളിൽ പ്ലാറ്റ്ഫോം ഡ്യൂട്ടിയിലുള്ളവർ ഇതിന്റെ അടിസ്ഥാനത്തിൽ ബന്ധപ്പെട്ട കോച്ചുകളും ബെർത്തുകളും നിരീക്ഷിക്കണമെന്നും ആവശ്യമെങ്കിൽ വനിതായാത്രക്കാരെ സഹായിക്കണമെന്നും നിർദേശം നൽകിയിട്ടുണ്ട്.