അജിത് ജോഗി അന്തരിച്ചു

റായ്പൂര്‍: മുന്‍ ഛത്തീസ്ഗഡ് മുഖ്യമന്ത്രിയും കോണ്‍ഗ്രസ് നേതാവുമായിരുന്ന അജിത് ജോഗി അന്തരിച്ചു. സ്വകാര്യ ആശുപത്രിയില്‍ ഹൃദയാഘാതത്തെ തുടര്‍ന്നാണ് അന്ത്യം.

മെയ് ഒന്‍പതിനാണ് വീട്ടില്‍ ഹൃദയാഘാതം അനുഭവപ്പെട്ടതിനെ തുടര്‍ന്ന് ആശുപത്രിയില്‍ പ്രവേശിപ്പിച്ചത്. ഇതിന് ശേഷം ആശുപത്രിയില്‍ തീവ്രപരിചരണ വിഭാഗത്തിലായിരുന്നു അജിത് ജോഗി. വെന്റിലേറ്റര്‍ സഹായത്തിലാണ് ഇദ്ദേഹം ജീവന്‍ നിലനിര്‍ത്തിയിരുന്നത്.

ബുധനാഴ്ച രാത്രി വീണ്ടും ഹൃദയാഘാതം സംഭവിച്ചതാണ് ഇദ്ദേഹത്തിന്റെ ആരോഗ്യനില വഷളാവാന്‍ ഇടയാക്കിയത്. 2000 മുതല്‍ 2003 വരെ ഛത്തീസ്ഗഡ് മുഖ്യമന്ത്രിയായിരുന്ന അജിത് ജോഗി ഒരു കാലത്ത് ദേശീയ തലത്തില്‍ തന്നെ ഏറെ സജീവമായിരുന്ന നേതാവായിരുന്നു. 2016ലാണ് ഇദ്ദേഹം കോണ്‍ഗ്രസ് വിട്ടത്. ഉപതെരഞ്ഞെടുപ്പുമായി ബന്ധപ്പെട്ട വിവാദത്തെ തുടര്‍ന്നാണ് ഇദ്ദേഹം കോണ്‍ഗ്രസ് വിട്ട് പുതിയ പാര്‍ട്ടിക്ക് രൂപം നല്‍കിയത്.