ന്യൂഡല്‍ഹി: രാജ്യത്തിന്റെ അന്തരീക്ഷത്തെ വിഷലിപ്തമാക്കാനുളള ശ്രമങ്ങള്‍ നടക്കുന്നതായി ബിജെപി നേതാവ് ഉമാ ഭാരതി. ചില ചിന്തകരാണ് ഇതിന് പിന്നില്‍. അവര്‍ കുറച്ചുപേരുമാത്രമാണെങ്കിലും,അവര്‍ ഉയര്‍ന്ന അളവില്‍ വിഷമുളള പാമ്പുകളെ പോലെയാണെന്നും ഉമാ ഭാരതി പറഞ്ഞു. ജവഹര്‍ലാല്‍ നെഹ്‌റു സര്‍വകലാശാലയില്‍ നടന്ന അക്രമസംഭവങ്ങളുടെ പശ്ചാത്തലത്തിലാണ് ഉമാ ഭാരതിയുടെ പ്രതികരണം.
'രാജ്യത്തെ ചില ചിന്തകര്‍ പാമ്പുകളെ പോലെയാണ് പെരുമാറുന്നത്. അവര്‍ കുറച്ചുപേര്‍ മാത്രമാണ്. എന്നാല്‍ അവര്‍ വലിയ അളവില്‍ വിഷം ചീറ്റുന്ന പാമ്പുകളെ പോലെയാണ്. അന്തരീക്ഷത്തെ വിഷലിപ്തമാക്കാനാണ് അവരുടെ ശ്രമം. ഞങ്ങള്‍ക്ക് ചിലത് ശരിയാക്കാനുണ്ട്. അത് ശരിയാക്കുക തന്നെ ചെയ്യും'- ഉമാ ഭാരതി പറഞ്ഞു.
ജനുവരി അഞ്ചിന് മുഖംമൂടി ധരിച്ച അക്രമിസംഘമാണ് രാത്രിയുടെ മറവില്‍ ജെഎന്‍യു ക്യാമ്പസില്‍ അക്രമം അഴിച്ചുവിട്ടത്. ഇവരുടെ ആക്രമണത്തില്‍ നിരവധി വിദ്യാര്‍ത്ഥികള്‍ക്കും അധ്യാപകര്‍ക്കും സാരമായി പരിക്കേറ്റു. ഇതിനെതിരെ രാജ്യത്ത് ഉടനീളം പ്രതിഷേധം തുടരുകയാണ്.ജെഎന്‍യുവിലെ അക്രമത്തെ നിരവധി പ്രമുഖരാണ് അപലപിച്ചത്. വിദ്യാര്‍ത്ഥികളോട് ഐക്യദാര്‍ഢ്യം പ്രഖ്യാപിച്ച് നിരവധിപ്പേര്‍ രംഗത്തുവന്നത് വലിയ വാര്‍ത്തയായിരുന്നു. ഈ പശ്ചാത്തലത്തിലാണ് ഉമാ ഭാരതിയുടെ വാക്കുകള്‍.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
