ആരാധനാലയങ്ങൾ തുറക്കാൻ അനുവദിക്കണം; മദ്രാസ് ഹൈക്കോടതിയിൽ ഹർജി

ചെന്നൈ: ആരാധനാലയങ്ങൾ തുറക്കാൻ അനുവദിക്കണമെന്ന് ആവശ്യപ്പെട്ട് മദ്രാസ് ഹൈക്കോടതിയിൽ ഹർജി. ലോക്ക്ഡൗണിനെ തുടർന്ന് അടഞ്ഞു കിടക്കുന്ന ആരാധനാലയങ്ങൾ തുറക്കണമെന്ന് ആവശ്യപ്പെട്ടാണ് ഹർജി.

കടകൾക്കും വ്യവസായശാലകൾക്കും ഇളവ് നൽകുന്ന സാഹചര്യത്തിൽ ആരാധനാലയങ്ങൾ തുറക്കാനും അനുമതി നൽകണമെന്നാണ് ആവശ്യം. ചെന്നൈ സ്വദേശി ആർകെ ജലീലാണ് ഹർജി നൽകിയത്. ഹർജി കോടതി നാളെ പരിഗണിക്കും. കോവിഡ് പ്രതിരോധത്തിൻറെ ഭാഗമായി പ്രഖ്യാപിച്ച ലോക്ഡൗണിനെ തുടർന്ന് ആരാധനാലയങ്ങളിൽ ചടങ്ങുകൾ നടക്കുന്നുണ്ടെങ്കിലും ആളുകൾക്ക് പ്രവേശനമില്ല.

അതിനിടെ തമിഴ്നാട്ടിൽ കോവിഡ് രോഗികളുടെ എണ്ണം ഉയരുകയാണ്. വൈറസ് പടർന്ന സാഹചര്യത്തിൽ കോയമ്പേട് മാർക്കറ്റ് അടക്കം പൂർണമായും അടച്ചിട്ടു. ചെന്നൈയിലാണ് ഏറ്റവും കൂടുതൽ രോഗ ബാധിതരുള്ളത്. കോയമ്പേട് തിരുവാൺമയൂർ ചന്തയിൽ വന്നുപോയവരാണ് കോവിഡ് ബാധിതരിൽ അധികവും. ചെന്നൈയിൽ സൂപ്പർ മാർക്കറ്റിലെ എട്ട് ജീവനകാർക്ക് കഴിഞ്ഞ ദിവസം കോവിഡ് സ്ഥിരീകരിച്ചു.