'പ്രേതങ്ങള്‍ വേട്ടയാടുന്നു, ഉറങ്ങാന്‍ പോലും പറ്റുന്നില്ല'; നാല് കുഞ്ഞുങ്ങളെ യുവതി കിണറ്റിലെറിഞ്ഞ് കൊന്നു

വഡോദര: ആത്മാക്കളുടെ ശല്യം കാരണം ഉറങ്ങാന്‍ പോലും സാധിക്കുന്നില്ലെന്ന കാരണത്താല്‍ നാല് കുഞ്ഞുങ്ങളെ യുവതി കിണറ്റിലെറിഞ്ഞ് കൊന്നു. ഗുജറാത്തിലെ ഭാവ്‌നഗറിലാണ് സംഭവം. അയല്‍വാസികള്‍ ഓടിയെത്തിയപ്പോഴേക്കും അഞ്ച് മക്കളെയും കിണറ്റിലെറിഞ്ഞ്
 പഞ്ച് പിപ്ല സ്വദേശിയായ ഗീത ഭല്യ കിണറ്റിലേക്ക് ചാടിയിരുന്നു. ഇവരെയും പത്ത് വയസുകാരിയായ മകളെയും നാട്ടുകാരും രക്ഷാപ്രവര്‍ത്തകരും ചേര്‍ന്ന് രക്ഷിച്ചുവെങ്കിലും നാല് കുട്ടികളുടെ ജീവന്‍ രക്ഷിക്കാനായില്ല. ഒന്ന്, ഒന്നര, എട്ട് വയസ് പ്രായമാണ് മരിച്ച കുഞ്ഞുങ്ങള്‍ക്കുള്ളത്. 

കണ്ണടച്ചാലുടന്‍ പ്രേതങ്ങള്‍ ശല്യം ചെയ്യാനായി എത്തുന്നുവെന്നും ഉറക്കം നഷ്ടപ്പെടുന്നതായും ഇവര്‍ നേരത്തെ ബന്ധുക്കളോട് പറഞ്ഞിരുന്നു. 
എന്നാല്‍ സാമ്പത്തികമായി ഇവര്‍ക്ക് കടുത്ത ബുദ്ധിമുട്ടുകളുണ്ടെന്നും ഭക്ഷണം കഴിക്കാന്‍ പോലും ബുദ്ധിമുട്ടിയിരുന്നതായും അയല്‍വാസികള്‍ വെളിപ്പെടുത്തി. 

 അമ്പലത്തില്‍ പോകുന്നുവന്ന് പറഞ്ഞാണ് കുട്ടികളുമായി വീടുവിട്ടിറങ്ങിയ യുവതി കൃഷിയിടത്തിന്റെ നടുവിലുള്ള കിണറ്റില്‍ ചാടുകയായിരുന്നു.