എണ്ണവ്യാപാരിയുമായി ഭാര്യയ്ക്ക് രഹസ്യ'സമ്പര്‍ക്കം' ; യുവതിയെയും കാമുകനെയും കൊലപ്പെടുത്തി, യുവാവ് ഒളിവില്‍

ഭോപ്പാല്‍ : മറ്റൊരാളുമായി രഹസ്യബന്ധമുണ്ടെന്ന സംശയത്തെത്തുടര്‍ന്ന് ഭാര്യയെ യുവാവ് വെടിവെച്ച് കൊലപ്പെടുത്തി. തൊട്ടുപിന്നാലെ ഭാര്യയുടെ ജാരനെന്ന് സംശയിക്കുന്ന എണ്ണവ്യാപാരിയെയും കൊലപ്പെടുത്തി. മധ്യപ്രദേശിലെ ഭിന്‍ഡ് ജില്ലയിലാണ് സംഭവം. 

ഗ്വാളിയോറില്‍ തൊഴിലാളിയായ ആനന്ദ് യാദവ്  എന്ന 30 കാരനാണ് ഇരട്ടക്കൊലപാതകം നടത്തിയത്. ഭാര്യ സരോജിന് എണ്ണവ്യാപാരിയായ ഹരിഓം അഗര്‍വാള്‍ എന്നയാളുമായി രഹസ്യബന്ധം ഉള്ളതായാണ് ആനന്ദ് സംശയിച്ചത്. 

ലോക്ക്ഡൗണിനെ തുടര്‍ന്നാണ് ഇയാള്‍ നാട്ടില്‍ തിരിച്ചെത്തിയത്. സംശയം രൂക്ഷമായതോടെ ഭാര്യയെ ഇയാള്‍ വെടിവെച്ച് കൊലപ്പെടുത്തുകയായിരുന്നു. തൊട്ടുപിന്നാലെ കാമുകനായ ഹരിഓം അഗര്‍വാളെ കുത്തിക്കൊലപ്പെടുത്തുകയും ചെയ്തു. 

മരണം ഉറപ്പാക്കാനായി ഇയാള്‍ ഹരിഓമിന് നേര്‍ക്ക് വെടിയുതിര്‍ക്കുകയും ചെയ്തതായി പൊലീസ് പറഞ്ഞു. സംഭവത്തിന് പിന്നാലെ ആനന്ദ് യാദവും സഹായിയും ഒളിവില്‍ പോയതായും, ഇവരെ കണ്ടെത്താന്‍ അന്വേഷണം ഊര്‍ജ്ജിതമാക്കിയതായും അഡീഷണല്‍ പൊലീസ് സൂപ്രണ്ട് സഞ്ജീവ് സിങ് കാഞ്ചന്‍ അറിയിച്ചു.