ന്യൂഡല്‍ഹി: ഓഖി ചുഴലിക്കാറ്റില്‍പെട്ട് കേരളത്തില്‍ നിന്ന് 261പേരെ കാണാതായെന്ന് കേന്ദ്രസര്‍ക്കാര്‍. പ്രതിരോധമന്ത്രി നിര്‍മല സീതാരാമന്‍ ലേക് സഭയിലാണ് ഇക്കാര്യം വ്യക്തമാക്കിയത്. മല്‍സ്യബന്ധനത്തിനായി കടലില്‍ പോയവരില്‍ 845 പേരെ രക്ഷപെടുത്തിയെന്നും ആകെ 661 മല്‍സ്യത്തൊഴിലാളികളെ ഇതുവരെ കണ്ടെത്താനായിട്ടില്ലെന്നും അവര്‍ ലോക്‌സഭയില്‍ വ്യക്തമാക്കി. എഴുതി ചോദിച്ച ചോദ്യത്തിനായിരുന്നു മന്ത്രിയുടെ മറുപടി. ഈ മാസം 20വരെയുള്ള കണക്കാണ് മന്ത്രി സഭയെ അറിയിച്ചത്.
നാവിക, വ്യോമ സേനകളും കോസ്റ്റ് ഗാര്‍ഡും സംയുക്തമായി നടത്തിയ തിരച്ചിലില്‍ ഡിസംബര്‍ 20 വരെ 821 പേരെ രക്ഷപെടുത്തി. 24 പേരെ മര്‍ച്ചന്റ് നേവി കപ്പലുകളടക്കമുള്ളവ രക്ഷപെടുത്തി. ഇതുവരെ രക്ഷപെടുത്തിയവരില്‍ 453 പേര്‍ തമിഴ്‌നാട്ടില്‍നിന്നും 362 പേര്‍ കേരളത്തില്‍നിന്നും 30 പേര്‍ ലക്ഷദ്വീപ്, മിനിക്കോയി ദ്വീപില്‍നിന്നുമുള്ളവരാണ്. കാണാതായ 661 മല്‍സ്യത്തൊഴിലാളികളില്‍ അധികം പേരും തമിഴ്‌നാട്ടില്‍നിന്നുള്ളവരാണ് 400 പേരെയാണ് ഇവിടെനിന്നും കണ്ടെത്താനുണ്ടെന്നും മന്ത്രി പറഞ്ഞു. അതേസമയം, കേരളത്തില്‍നിന്നു കാണാതായത് 143 പേരെയാണെന്നും എണ്ണത്തിന്റെ കാര്യത്തില്‍ തെറ്റിദ്ധാരണ സൃഷ്ടിക്കാന്‍ നോക്കേണ്ടെന്നും സംസ്ഥാന ഫിഷറീസ് വകുപ്പു മന്ത്രി ജെ. മേഴ്‌സിക്കുട്ടിയമ്മ പറഞ്ഞു. കേന്ദ്രം പ്രഖ്യാപിച്ച ദുരിതാശ്വാസ പാക്കേജ് വര്‍ധിപ്പിക്കണമെന്നും മന്ത്രി വ്യക്തമാക്കി.
ദുരന്തത്തില്‍ കാണാതായവര്‍ക്കുവേണ്ടി ഇതരസംസ്ഥാന തീരങ്ങളില്‍ അവരുടെ സഹായത്തോടെ തിരച്ചില്‍ നടത്തുമെന്ന് കേരള സര്‍ക്കാര്‍ അറിയിച്ചിട്ടുണ്ട്. തീരപ്രദേശമുള്ള അയല്‍ സംസ്ഥാനങ്ങളില്‍ മല്‍സ്യത്തൊഴിലാളികളുടെ സാന്നിധ്യത്തിലാകും തിരച്ചില്‍. പുറമെ കേന്ദ്ര സര്‍ക്കാരിന്റെ നേതൃത്വത്തില്‍ സംസ്ഥാനത്തിന്റെ തീരങ്ങളില്‍ നാവിക, തീരസേനകള്‍ നടത്തുന്ന തിരച്ചില്‍ തുടരും. തമിഴ്‌നാട്, ഗോവ, കര്‍ണാടക, ആന്ധ്ര തുടങ്ങിയ സംസ്ഥാനങ്ങളുടെ തീരങ്ങളില്‍ തിരച്ചില്‍ കേന്ദ്രീകരിക്കാനാണു നിര്‍ദേശം. ഇതിനായി അവിടത്തെ മല്‍സ്യത്തൊഴിലാളികളുടെ സഹകരണവും തേടി. പുറമെ അയല്‍രാജ്യങ്ങളുടെ തീരങ്ങളില്‍ തിരച്ചില്‍ നടത്താന്‍ കേന്ദ്രസര്‍ക്കാരിനോടു നടപടി ആവശ്യപ്പെടും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
