കനാൽ കരയിൽ പാട്ട് കേട്ടിരിക്കവെ പുലിയുടെ ആക്രമണം; കാട്ടിലേക്ക് വലിച്ചിഴച്ചു; എട്ടാം ക്ലാസുകാരിക്ക് ദാരുണാന്ത്യം

ഡെറാഡൂൺ: ഹെഡ് ​ഫോണിൽ പാട്ട്​ കേട്ടിരിക്കുകയായിരുന്ന പെൺകുട്ടിയെ പുലി ആക്രമിച്ച് കൊലപ്പെടുത്തി. എട്ടാം ക്ലാസ്​ വിദ്യാർഥിനിയായ മംമ്തയാണ്​ മരിച്ചത്​. ഉത്തരാഖണ്ഡിലെ നൈനിറ്റാൽ ജില്ലയിലുള്ള രാംനഗർ മേഖലയിലാണ്​ ദാരുണ സംഭവം​.

രാംനഗറിലെ ബൈൽപരാവോ വന മേഖലക്കടുത്തുള്ള ചുനാഖാൻ ഭാഗത്താണ്​ പെൺകുട്ടിയുടെ വീട്​. വീടിന്​ സമീപത്തു കൂടി ഒഴുകുന്ന കനാലി​​ന്റെ കരയിലിരുന്ന് കുട്ടി പാട്ട് കേൾക്കുകയായിരുന്നു. ഈ സമയത്താണ് പുലി ആക്രമിച്ചതെന്ന് അധികൃയർ പറഞ്ഞു. പെൺകുട്ടിയെ പുലി കാട്ടിലേക്ക്​ വലിച്ചു കൊണ്ടുപോയതിന് ശേഷമാണ് വകവരുത്തിയത്.

‘സംഭവത്തെ കുറിച്ച്​ ഗ്രാമവാസികളിൽ നിന്ന്​ വിവരം ലഭിച്ചയുടനെ സ്ഥലത്തേക്ക്​ പോയി. ഒരു ഹെഡ്​ഫോണും ചീപ്പും സമീപത്ത്​ നിന്ന്​ ലഭിച്ചിട്ടുണ്ട്​. പെൺകുട്ടി പാട്ട്​ കേൾക്കുന്ന സമയത്താണ്​ പുലി ആക്രമിക്കാൻ വന്നത്​. പാട്ടിൽ ലയിച്ചിരുന്നതിനാൽ പുലി വന്നത്​ അവൾ അറിഞ്ഞു കാണില്ല‘- ബൈൽപരാവോ വനത്തിലെ റെയ്​ഞ്ചർ സന്തോഷ്​ പന്ത്​ പറഞ്ഞു.

കഴിഞ്ഞ ഒരു മാസത്തിനിടെ എട്ട്​ പേരെയാണ്​​ ഈ മേഖലയിൽ പുലികൾ കൊലപ്പെടുത്തിയത്​. ആക്രമണം വർധിച്ചതിന്റെ പശ്ചാത്തലത്തിൽ സ്ഥിരമായി പുലികൾ വരുന്ന മേഖലകളിൽ​ ഏഴ്​ ക്യാമറകളും രണ്ട്​ കൂടുകളും സ്ഥാപിച്ചിട്ടുണ്ട്. എന്നാൽ പുലി വരു​മ്പോൾ പ്രദേശവാസികൾ ശബ്ദമുണ്ടാക്കുന്നതിനാൽ അവ കാടിനുള്ളിലേക്ക്​ തിരിച്ചോടി പോകുമെന്നും വനപാലകൾ പറയുന്നു.