ചര്‍ച്ചകള്‍ നടക്കാതെ പാര്‍ലമെന്റില്‍ ബഹളം തുടരുന്നതിനിടയിലും ശമ്പള വര്‍ധന ആവശ്യപ്പെട്ട് എംപിമാര്‍

ന്യൂഡല്‍ഹി :  ഒരു ക്രിയാത്മക ചര്‍ച്ച പോലും നടക്കാതെ ഈ ആഴ്ചത്തേക്ക് രാജ്യസഭ പിരിഞ്ഞപ്പോഴും, എംപിമാര്‍ ശമ്പള വര്‍ധന ആവശ്യപ്പെട്ട് രംഗത്തുവന്നത് പരിഹാസ്യമായി. വെളളിയാഴ്ചയാണ്  ഈ ആവശ്യം ഉന്നയിക്കുന്നതിന് രാജ്യസഭ സാക്ഷിയായത്. 

ഗുജറാത്ത് തെരഞ്ഞെടുപ്പ് അട്ടിമറിക്കുന്നതിന് വേണ്ടി കോണ്‍ഗ്രസ് പാക്കിസ്ഥാനുമായി ഗൂഡാലോചന നടത്തിയെന്ന ആരോപണം ഉന്നയിച്ച പ്രധാനമന്ത്രി നരേന്ദ്രമോദി മാപ്പുപറയണമെന്ന് ആവശ്യപ്പെട്ടാണ് വെളളിയാഴ്ചയും പ്രതിപക്ഷം സഭാ നടപടികള്‍ തടസ്സപ്പെടുത്തിയത്. സഭാനടപടികള്‍ മുന്നോട്ടുകൊണ്ടുപോകാന്‍ കഴിയാതെ വന്നതോടെ രാജ്യസഭ ഇന്നത്തേയ്ക്ക് പിരിഞ്ഞു. വാരാന്ത്യ അവധിക്കും ക്രിസ്തുമസ് അവധിക്കും ശേഷം ഇനി ബുധനാഴ്ച മാത്രമേ സഭ സമ്മേളിക്കൂ.

സമാജ് വാദി പാര്‍ട്ടിയുടെ നരേഷ് അഗര്‍വാള്‍ ആണ് ശമ്പള വര്‍ധന സഭയില്‍ ഉന്നയിച്ചത്. ഈ ആവശ്യത്തെ മറ്റു അംഗങ്ങള്‍ പിന്തുണച്ചു. ഇതുസംബന്ധിച്ച യോഗി ആദിത്യനാഥിന്റെ നേതൃത്വത്തിലുളള പാര്‍ലമെന്റ് സമിതിയുടെ ശുപാര്‍ശ നടപ്പിലാക്കണമെന്ന് നരേഷ് അഗര്‍വാള്‍ ആവശ്യപ്പെട്ടു. ശമ്പള വര്‍ധന ഏഴാം ശമ്പള കമ്മീഷനില്‍ ഉള്‍പ്പെടുത്തണം. ക്യാബിനറ്റ് സെക്രട്ടറിയെക്കാള്‍ ഒരു രൂപ കൂടുതല്‍ കിട്ടുന്ന നിലയില്‍ ശമ്പള വര്‍ധന നടപ്പിലാക്കണമെന്നും നരേഷ് അഗര്‍വാള്‍ ആവശ്യപ്പെട്ടു. എംപിമാരുടെ ശമ്പളം മെച്ചപ്പെട്ടതല്ലെന്ന് ചൂണ്ടികാട്ടി കേന്ദ്രമന്ത്രി രാംദാസ് അതാവാലയും നരേഷ് അഗര്‍വാളിന് ഐക്യദാര്‍ഡ്യം പ്രഖ്യാപിച്ച് രംഗത്തുവന്നു.