ജീവിതത്തില്‍ ഇതുവരെ ബാങ്കില്‍ പോയിട്ടില്ല; കൂലിപ്പണിക്കാരന് രണ്ടര ലക്ഷത്തിന്റെ നികുതി അടക്കാന്‍ നോട്ടീസ്

നബരംഗ്പുര്‍: ഒന്നരക്കോടി രൂപയുടെ പണമിടപാടു നടത്തിയെന്നു കാണിച്ച് കൂലിപ്പണിക്കാരനു രണ്ടര ലക്ഷം രൂപ നികുതിയടക്കാന്‍ നോട്ടീസ്. ഒഡീഷയിലെ നബരംഗ്പൂര്‍ പുജാരി ബരന്ദി വില്ലേജിലെ സ്വനാധര്‍ ഗോണ്ഡിനാണ് നോട്ടിസ് ലഭിച്ചത്.

സ്വനാധറിന്റെ അക്കൗണ്ടില്‍ 1.47 കോടി രൂപ നിക്ഷേപിച്ചതായും അതിന്റെ നികുതിയായി 2.59 ലക്ഷം രൂപ അടച്ചിട്ടില്ലെന്നും നോട്ടിസില്‍ പറയുന്നു. ഇതുവരെയായി ബാങ്കില്‍ പോലും പോകാത്ത തനിക്ക് ലക്ഷങ്ങളുടെ നികുതി അടക്കാന്‍ നോട്ടീസ് വന്ന ഞെട്ടലിലാണ് ഇദ്ദേഹം.

'ജീവിതത്തില്‍ ബാങ്കില്‍ പോയിട്ടില്ല. കടയുടെ ഉടമസ്ഥന്റെ മകന്‍ ആധാര്‍ കാര്‍ഡ്, വോട്ടര്‍ കാര്‍ഡ് എന്നിവ വാങ്ങിയിരുന്നു. വെള്ളക്കടലാസില്‍ വിരലടയാളം പതിച്ചു. അവന്‍ ചതിച്ചതാകാം'- സ്വനാധര്‍ പറഞ്ഞു.