ജോലി ചെയ്തില്ലെങ്കിൽ ഒഴിവാക്കും; സർക്കാർ ജീവനക്കാർക്ക് പുതിയ മാർ​ഗ നിർദ്ദേശവുമായി കേന്ദ്രം

ന്യൂഡൽഹി: ജോലി ചെയ്യാത്ത സർക്കാർ ജീവനക്കാർക്കെതിരെ കർശന നടപടിയെടുക്കുമെന്ന മുന്നറിയിപ്പുമായി കേന്ദ്ര സർക്കാർ. ജോലി ചെയ്യാത്തവരെ ഒഴിവാക്കാനുള്ള മാർ​ഗ നിർദ്ദേശങ്ങൾ കേന്ദ്രം പുറത്തിറക്കി. ജോലി ചെയ്യാത്ത ജീവനക്കാരോട് വിരമിക്കാൻ ആവശ്യപ്പെടാമെന്നാണ് മാർ​ഗ നിർദ്ദേശത്തിൽ പറയുന്നു. സിവിൽ സർവ്വീസ് ഉദ്യോഗസ്ഥർക്കും മറ്റ് ജീവനക്കാർക്കും മാർഗ നിർദ്ദേശം ബാധകമാണ്.

ഗ്രൂപ്പ് എ, ബി ഉദ്യോഗസ്ഥരോട് 50 വയസ് കഴിയുമ്പോൾ വിരമിക്കാൻ ആവശ്യപ്പെടാം എന്നാണ് മാർ​ഗ നിർദ്ദേശത്തിൽ പറയുന്നത്. മറ്റുള്ളവരോട് 55 വയസ് കഴിയുമ്പോഴും വിരമിക്കാൻ ആവശ്യപ്പെടും. 30 വർഷം സർവ്വീസ് പൂർത്തിയാക്കിയവർക്ക് പ്രായം നോക്കാതെ ഇത് ബാധകമാക്കാം. ജോലിയിൽ ഉഴപ്പുന്നവരോട് വിരമിക്കാൻ പറയാം എന്നും നിർദ്ദേശത്തിൽ വ്യക്തമാക്കുന്നു.

സത്യസന്ധരല്ലാത്ത ഉദ്യോഗസ്ഥരോടും വിരമിക്കാൻ ആവശ്യപ്പെടാം. നിലവിലെ ചട്ടങ്ങൾ ക്രോഡീകരിച്ചാണ് ഉത്തരവെന്ന് സർക്കാർ അറിയിച്ചു. വിരമിക്കുന്നവർക്ക് പെൻഷൻ ആനുകൂല്യം ചട്ടപ്രകാരം നൽമെന്നും മാർ​ഗ നിർദ്ദേശത്തിൽ വ്യക്തമാക്കുന്നു.