തിളച്ചു പൊന്തുന്ന സാമ്പാറില്‍ വീണു; മൂന്നു വയസ്സുകാരന് ദാരുണാന്ത്യം

ഹൈദരാബാദ്: തിളച്ചു പൊന്തുന്ന സാമ്പാറില്‍ വീണ് മൂന്നുവയസ്സുകാരന് ദാരുണാന്ത്യം. ഗുരുതരമായി പൊളളലേറ്റ കുട്ടി ചികിത്സയ്ക്കിടെയാണ് മരിച്ചത്. തന്റെ മകന് സാമ്പാര്‍ പാകം ചെയ്യുന്ന പാത്രത്തില്‍ വീണ് ഗുരുതരമായി പൊളളലേറ്റതായുളള അച്ഛന്റെ പരാതിയെ തുടര്‍ന്നാണ് സംഭവം പുറത്തുവന്നത്.

തെലങ്കാന രംഗ റെഡ്ഡിയിലെ സൈബറാബാദ് പൊലീസ് സ്റ്റേഷന്‍ പരിധിയിലാണ് സംഭവം. ഒരു പരിപാടിയില്‍ പങ്കെടുക്കുന്നതിനിടെ, കുട്ടി തിളച്ചുപൊന്തുന്ന സാമ്പാറിന്റെ പാത്രത്തില്‍ വീഴുകയായിരുന്നുവെന്ന് പരാതിയില്‍ പറയുന്നു.

മൂന്നുവയസ്സുകാരനെ ഉടനെ തന്നെ സര്‍ക്കാര്‍ ആശുപത്രിയിലേക്ക് കൊണ്ടുപോയി. തുടര്‍ന്ന് വിദഗ്ധ ചികിത്സയ്ക്കായി മറ്റൊരു ആശുപത്രിയിലേക്ക് മാറ്റിയെങ്കിലും മരണം സംഭവിക്കുകയായിരുന്നു. ഗുരുതരമായി പൊളളലേറ്റതാണ് കുട്ടിയുടെ മരണത്തിന് ഇടയാക്കിയതെന്ന് പൊലീസ് പറയുന്നു. കേസ് രജിസ്റ്റര്‍ ചെയ്ത പൊലീസ് അന്വേഷണം ആരംഭിച്ചു.