ദൈവത്തിന് നിയമപരമായ വ്യക്തിത്വമില്ല, വിഗ്രഹത്തിന് ഉണ്ടെന്ന് സുപ്രീം കോടതി 

ന്യൂഡല്‍ഹി: ദൈവം സര്‍വവ്യാപിയും സര്‍വജ്ഞാനിയും സര്‍വശക്തനും ആയിരിക്കാമെങ്കിലും നിയമപരമായ വ്യക്തിത്വമല്ലെന്ന് സുപ്രീം കോടതി. എന്നാല്‍ ദൈവ രൂപമായി വിശ്വാസികള്‍ ആരാധിക്കുന്ന വിഗ്രഹത്തിന് നിയമപരമായ വ്യക്തിത്വമുണ്ടെന്ന്, അയോധ്യാ കേസിനു തീര്‍പ്പു കല്‍പ്പിച്ചുകൊണ്ടുള്ള വിധിയില്‍ സുപ്രീം കോടതി വ്യക്തമാക്കി.

ദൈവം അഥവാ പരമായ സത്തയ്ക്ക് നിയമ വ്യക്തിത്വം കല്‍പ്പിച്ചുനല്‍കിയിട്ടില്ല. സര്‍വ വ്യാപിയും സര്‍വജ്ഞാനിയും സര്‍വ ശക്തനും ആയ അതിനു ഭൗതികമായ രൂപമില്ല. ദൈവത്തിനു കോടതി നിയമ വ്യക്തിത്വം കല്‍പ്പിച്ചുനല്‍കിയിട്ടില്ലെന്ന് ചീഫ് ജസ്റ്റിസ് ആയിരുന്ന രഞ്ജന്‍ ഗൊഗോയിയുടെ നേതൃത്വത്തിലുള്ള ബെഞ്ചിന്റെ വിധിന്യായത്തില്‍ പറയുന്നു.

ഹിന്ദു തത്വചിന്തയില്‍ ദൈവികത്വം എന്നത് സീമാതീതവും സാര്‍വത്രികവും അനന്തവുമാണെന്ന് കോടതി ചൂണ്ടിക്കാട്ടുന്നു.