കാണ്‍പൂര്‍ : ഒളിവിലുള്ള കാണ്‍പൂര്‍ വെടിവെപ്പ് കേസിലെ പ്രതി ദീപ് പ്രകാശ് ദുബെയോട് കീഴടങ്ങാന്‍ ആവശ്യപ്പെട്ട് അമ്മ. ഉടന്‍ പൊലീസിന് മുന്നില്‍ വന്ന് കീഴടങ്ങുക. അല്ലെങ്കില്‍ നിന്നെയും നിന്റെ കുടുംബത്തെയും പൊലീസ് കൊല്ലുമെന്ന് ദീപ് പ്രകാശിന്റെ അമ്മ സരളാദേവി പറഞ്ഞു. പൊലീസ് ഏറ്റുമുട്ടലില്‍ കൊല്ലപ്പെട്ട കൊടുംകുറ്റവാളി വികാസ് ദുബെയുടെ സഹോദരനാണ് ദീപ് പ്രകാശ് ദുബെ.
ഒളിവിലിരുന്ന് നിനക്ക് ഒന്നും ചെയ്യാനാകില്ല. പൊലീസില്‍ കീഴടങ്ങിയാല്‍ മാത്രമേ നിനക്ക് സുരക്ഷ ലഭിക്കൂ. നിന്റെ സഹോദരന്‍ വികാസ് ദുബെയുമായുള്ള ബന്ധം അടക്കം ഒന്നും മറച്ചുവെക്കാനാവില്ലെന്നും അമ്മ സരളാദേവി ഓര്‍മ്മിപ്പിച്ചു.
കൊടുംകുറ്റവാളിയായ വികാസ് ദുബെയെ പിടികൂടാന്‍ കാണ്‍പൂരിലെ വീട്ടിലെത്തിയ ഡിഎസ്പി അടക്കം എട്ട് പൊലീസ് ഉദ്യോഗസ്ഥരെ വെടിവെച്ച് കൊലപ്പെടുത്തിയ കേസിലെ പ്രതിയാണ് ദീപ് പ്രകാശ്. സഹോദരന്‍ വികാസ് ദുബെയുടെ നേതൃത്വത്തിലായിരുന്നു പൊലീസുകാരെ കൊലപ്പെടുത്തിയത്. ഇതിനു പിന്നാലെ ദീപ് പ്രകാശ് ഒളിവില്‍ പോകുകയായിരുന്നു.
ദീപ് പ്രകാശിനെക്കുറിച്ച് വിവരം നല്‍കുന്നവര്‍ക്ക് 20,000 രൂപ പാരിതോഷികം നല്‍കുമെന്ന് യു പി പൊലീസ് അറിയിച്ചിരുന്നു. പൊലീസുകാരെ കൊലപ്പെടുത്തിയശേഷം ഒളിവില്‍ പോയ വികാസ് ദുബെയെ മധ്യപ്രദേശിലെ ഉജ്ജയിനില്‍ വെച്ച് പൊലീസ് പിടികൂടിയിരുന്നു. തുടര്‍ന്ന് നാട്ടിലേക്ക് കൊണ്ടുവരുന്നതിനിടെ, രക്ഷപ്പെടാനുള്ള ശ്രമത്തിനിടെ വികാസ് ദുബെയെ പൊലീസ് വെടിവെച്ച് കൊലപ്പെടുത്തുകയായിരുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
